भरतपुरमा शिखर इन्सुरेन्सको बोर्ड झिक्ने क्रममा विद्युत सट भई जलेर एक जनाको मृत्यु

चितवन। भरतपुरमा करेन्ट लागेर शिखर ईन्सुरेन्स कम्पनी कार्यरत कर्मचारीको मृत्यु भएको छ। भरतपुर- १० कटहर चोक बस्ने ३५ वर्षीय सकुन्तला पौडेल सुवेदीको करेन्ट लागेर मृत्यु भएको प्रहरीले जनाएको हो।

जिल्ला प्रहरी कार्यालय चितवनका अनुसार आइतबार दिउँसो सवा १ बजे भरतपुर १० बालमन्दिर रोड स्थित मोडको घरको तेश्रो तल्लामा संचालन रहेको बीमा कम्पनीको बाहिर पट्टी झुण्ड्याएर राखिएको फ्लेक्स बोर्ड झिक्ने क्रममा अचानक करेन्ट सट भई आगोलागी हुँदा पौडेलसंगै अर्का कर्मचारी तरुण थापा पनि घाइते भएका थिए।

उनीहरुको उपचारका लागि भरतपुर अस्पताल लैजाने क्रममा सुवेदीको बाटोमै मृत्यु भएको अस्पतालले घोषणा गरेको हो। घाइते थापाको उपचारको लागी नयाँ मेडीकल कलेज भरतपुर पठाईएको प्रहरीले जनाएको छ ।