चितवनमा सिआइडी बनेर चोरी गर्ने समूह पक्राउ

चितवन । चितवनमा प्रहरीले सिआइडी बनेर चोरी गर्ने एक समूहलाई पक्राउ गरेको छ । भरतपुर १० स्थित सुष्मा गुरुङको घरमा नक्कली सिआइडी बनेर भित्र पसी गहनालगायत नगद चोरी गर्ने ६ जनालाई जिल्ला प्रहरी कार्यालय चितवनले पक्राउ गरेको हो ।

पक्राउ पर्नेहरुमा गोरखा घर भएका हाल भरतपुर ११ मा बस्ने २२ वर्षका विमल गुरुङ, सोही स्थानका २५ वर्षीय सागर कुमाल, बाग्लुङको जमैनी घर भई हाल भरतपुर ११ मै बस्ने २४ वर्षीय जीवन पौडेल, सोही स्थानका २० वर्षीय समिर कुमाल, २१ वर्षीय सन्दिप गुरुङ र भरतपुर १० का २२ वर्षीय निर्दोष थापा क्षेत्री रहेका छन् ।

जिल्ला प्रहरी कार्यालय चितवनका प्रवक्ता तथा सुचना अधिकारी सरोज गिरीका अनुसार उनीहरुले एक थान चाँदीको बाला र ४६ हजार रुपैयाँ चोरी गरेका थिए ।