भारतमा कोरोना खोप लगाएका ५२ जनामा साइडइफेक्ट, एक जनाको अवस्था गम्भीर

काठमाडौं । भारतीय नागरिकले शनिबारदेखि कोरोना भाइरसविरुद्धको खोप लगाउन सुरु गरेका छन् । कोरोना भाइरसविरुद्धको खोप लगाएकै दिन ५२ जनामा साइडइफेक्ट देखिएको भारतीय मिडियाले जनाएका छन् । भारतीय मिडियाका अनुसार साइडइफेक्ट देखिएको एक जनाको अवस्था गम्भीर रहेको छ । 

भारतको पश्चिम बंगाल, तेलंगना, राजस्थानलगायतका स्थानमा खोप लगाएपछि साइडइफेक्ट देखिएको बताइएको छ । भारतमा कोरोना खोप पहिलो दिन स्वास्थ्यकर्मी र सरसफाइकर्मीलाई  दिइएको थियो । स्वास्थ्यकर्मी र सरसफाइकर्मी नै खोपको साइडइफेक्टमा परेका छन् । अधिकांशलाई खोप लगाएको दुई घन्टामै एलर्जीको समस्या देखिएको थियो । 

राजधानी नयाँ दिल्लीका ११ जिल्लाका ८ हजार ११७ जनालाई पहिलो दिन खोप लगाइएको थियो । तीमध्ये ४ हजार ३१९ जना कर्मचारी दिए । जसमा ५२ जनालाई खोपको साइडइफेक्ट देखिएको भारतीय मिडियाहरुले जनाएका छन् । भारतको ड्रग कन्ट्रोलर जनरल अफ इन्डिया (डीसीजीआई)ले कोरोनाका दुई खोप कोभिसिल्ड र कोभ्याक्सिनलाई आपतकालीन प्रयोगको अनुमति दिएको छ ।