एक पटक फेरि सम्पत्तिको स्वघोषणा गर्न दिऔं : डा बाबुराम भट्टराई

काठमाडौं । पूर्वप्रधानमन्त्री डा बाबुराम भट्टराईले एक पटकलाई फेरि सम्पत्तिको स्वघोषणा गर्न दिनुपर्ने बताएका छन् ।

प्रतिनिधिसभामा आर्थिक वर्ष २०७७र७८ को बजेटमाथिको छलफलमा भाग लिँदै उनले भने  ‘सम्पत्ति स्वयं घोषणा गर्न दिऔं, कालोसेतो नभनौं एकचोटीलाई’ उनले भने ‘सबैले सम्पत्ति अभिलेखीकरण गरौं । त्यो गर्‍यो भने राजस्व बढ्छ ।’

यसअघि भट्टराई अर्थमन्त्री भएका बेला २०६५ सालमा पनि सम्पत्तिको स्वघोषणा गर्ने योजना ल्याएका थिए ।

अर्बौ सम्पत्ति जमिनमा लगाउने र त्यसको कर नतिर्ने प्रवृत्ति देखिएको भन्दै उनले नागरिकको सबै सम्पत्ति अभिलेखीकरण गरी कर लगाउनुपर्ने बताएका हुन् । व्यवसाय गर्‍यो भने कर लाग्ने, जग्गा किन्दा र घर बनाउँदा नलाग्ने प्रचलन अन्त्य गर्नुपर्ने भट्टराईले बताए ।

उनले शिक्षा र स्वास्थ्यमा मुनाफाका लागि लगानी गर्न दिन नहुने भन्दै यसमा सबै दायित्व राज्यले लिनुपर्ने पनि बताए । 

उनले लगानीकर्तालाई भने ‘मुनाफाका निम्ति शिक्षा र स्वास्थ्यमा नगर्नुस्, बरु कृषि, ऊर्जामा गर्नुहोस् । शिक्षा र स्वास्थ्य सेवा र परोपकारको क्षेत्र हो ।’