मिर्गौला प्रत्यारोपणको दुई साता नबित्दै प्रधानमन्त्री ओलीले बढाए सक्रियता, के भन्छन् चिकित्सकहरु ?

काठमाडौँ । मिर्गौला प्रत्यारोपण गरेको दुई साता बित्न नपाउँदै प्रधानमन्त्री केपी शर्मा ओलीले सक्रियता बढाएका छन् । प्रधानमन्त्री ओलीको उपचारमा संलग्न चिकित्सकहरुले उनलाई सकेसम्म ६ महिना त्यो सम्भव नभए कम्तीमा एक महिना आराम गर्न सुझाव दिएका थिए ।

टिचिङ अस्पतालमा मिर्गौला प्रत्यारोपण गरी १२ दिनपछि गत शुक्रबार बालुवाटार फर्केलगत्तै प्रधानमन्त्री ओलीले आफ्नो व्यस्तता बढाएका छन् । आइतबार साँझ सिंहदरबार पुगेर उनले सार्क राष्ट्रका प्रधानमन्त्रीहरुको भिडियो कन्फरेन्समा सहभागिता जनाएका थिए ।

चिकित्सकहरुले प्रधानमन्त्री ओलीलाई यति चाँडै बाहिरी कार्यक्रममा नजान सुझाव दिएका थिए । तर, यो सुझावविपरित आफ्नै स्वास्थ्यलाई वेवास्ता गर्दै हिँडडुल र भेटघाट बढाएपछि स्वयम् प्रधानमन्त्री ओलीको मिर्गौला प्रत्यारोपणमा संलग्न चिकित्सकहरु नै चिन्तित बनेका छन् । 

प्रधानमन्त्रीका निजी चिकित्सक डा. दिव्यासिंह शाह पनि प्रधानमन्त्री ओलीले सक्रियता देखाउने बेला नभएको बताउँछिन् । ‘सुतेर नै बस्नुपर्छ भन्ने होइन, तर उहाँको घाउ नै ठिक भइसकेको छैन । त्यसका लागि हामीले १ महिना रेष्ट गर्नुपर्छ भनेका हौँ’, उनले भनिन्, ‘आइतबार महत्त्वपूर्ण कार्यक्रम भएकाले पनि प्रधानमन्त्री सिंहदरवारमा भएको भिडियो कन्फरेन्समा सहभागी हुनु भएको हो । अब त्यसरी बाहिर जानुहुन्न । हामी त्यस्तो सल्लाह दिदैनौं ।’ 

मिर्गौला रोग विशेषज्ञ डा. ऋषिकुमार काफ्ले प्रधानमन्त्रीले यति चाँडो सक्रियता देखाउनु हतार र खतरा रहेको बताउँछन् । उनले आफ्नो अनुभवमा मिर्गौला प्रत्यारोपण गरेको मान्छे यति छिटो सक्रिय भएको नदेखेको भन्दै ६ महिना रेष्ट गर्नु नै बुद्धिमतता हुने सुझाव दिए । ‘हुन त उहाँका लागि चिकित्सकको टोली नै छ । उहाँले चिकित्सकले भनेको पनि मान्नुहुन्छ भनेको सुनिन्छ । यो सुन्दा चिकित्सक टोलीकै सुझावमा उहाँको सक्रियता बढेको बुझ्नुपर्ने हुन्छ’, डा. काफ्लेको भनाइ छ ।