प्रधानमन्त्री ओली फेरि आज अस्पताल जादैं

काठमाडौं । मृगौला पूनः प्रत्यारोपण गरेर शुक्रबार १२ दिनपछि अस्पतालबाट डिस्चार्ज भएका प्रधानमन्त्री केपी शर्मा ओली आज फेरि अस्पताल जादैंछन् ।

शनिबार आफ्नै निवासमा नेकपाका अध्यक्ष तथा पूर्व प्रधानमन्त्री पुष्पकमल दाहाल (प्रचण्ड), वरिष्ठ नेता माधव नेपाल, महासचिव विष्णु पौडेलसहितका प्रधानमन्त्रीका निजि सचिवालयका सल्लाहकारहरु र उपप्रधान तथा रक्षामन्त्री इश्वरपोखरेलसँग फरक – फरक समयमा भेटघाट गरी आफनो क्रियाशिलता वढाउने संकेत गरेका प्रधानमन्त्री ओली आज अस्पताल जान लागेका हुन् ।

ओलीलाई शुक्रबार मात्र डाक्टरहरुले अस्पतालवाट डिस्चार्ज गरेका थिए । उनलाई एक महिनासम्म उच्च डोजको औषधी चलाईएको छ भने संक्रमणबाट जोगिनका लागि विशेष सर्तकता अपनाउन चिकित्सकहरुले सुझाव दिएका छन् । प्रधानमन्त्री ओली स्वास्थ्यमा कुनै समस्या देखिएर अहिले अस्पताल जान भने लागेका होइनन् । उनको फलोअप परिक्षणका लागि अस्पताल जान लागेको उनको नीजि सचिवालय स्रोतले बताएको छ ।

उनका निजी चिकित्सक डा. दिब्या सिंह लगायतको टोलीले उनको बालुवाटारमै पनि उच्च निगरानी बढाईरहेको छ । ओली त्रिवि शिक्षण अस्पताल जाने र स्वास्थ्य फलोअप परिक्षण गरेर पूनः निवास फर्किने कार्यक्रम रहेको छ । साँझ ५ बजे भने उनी सिंहदरवार पनि जानेछन् । त्यहाँ उनले सार्क राष्ट्रका नेताहरुका बीचमा हुन लागेको भिडियो वार्तामा सहभागीता जनाउनेछन् । त्यसैका लागि उनले सिंहदरबार जाने तयारी पनि गरेको उनका परराष्ट्र सल्लाहकार डा. राजन भटटराईले जानकारी दिएका छन् ।

ओलीको २१ फागुनमा देश्रो पटक मृगौला प्रत्यारोपण गरिएको थियो । त्यस अगाडी २०६४ सालमा पनि प्रधानमन्त्री ओलीको पहिलो पटक मृगौला प्रत्यारोपण गरिएको थियो ।