गृहजिल्ला चितवन पुगेर अध्यक्ष प्रचण्डले भने– बामदेवलाई राष्ट्रिय सभामा लैजान प्रधानमन्त्रीले एकदुई दिनमा मान्नुहुन्छ

चितवन । पूर्वप्रधानमन्त्री तथा नेकपाका अध्यक्ष पुष्पकमल दाहाल ‘प्रचण्ड’ले पार्टीका उपाध्यक्ष बामदेव गौतमलाई राष्टिय सभामा लैजानको लागि प्रधानमन्त्री केपी शर्मा ओलीले एक\दुई दिनमा मान्ने बताउनुभएको छ । 

गृहजिल्ला चितवनका विभिन्न कार्यक्रमहरुमा सरिक हुन आउनुभएका अध्यक्ष प्रचण्डले भरतपुर विमानस्थलमा भएको पत्रकार भेटघाट कार्यक्रममा पार्टीमा अहिले देखिएको विवाद सामान्य रहेको बताउनुभयो । उहाँले भन्नुभयो, ‘पार्टीमा यस्ता विवादहरु भइराख्छन् र समाधान पनि हुन्छन् ।’ 

अध्यक्ष प्रचण्डले ढिलोमा यही २१ गतेसम्म प्रधानमन्त्री ओलीले नेता बामदेव गौतमलाई राष्ट्रिय सभा सदस्यको लागि सिफारिस गर्ने बताउनुभयो । उहाँले सचिवालयले गरेको निर्णय उहाँ (प्रधानमन्त्री) ले मान्नुहुन्न भन्ने आफूलाई लाग्दै नलागेको बताउनुभयो । उहाँले भन्नुभयो, ‘मान्नु भएन भने के गर्ने भन्नेतर्फ अहिले नलागौँ ।’

चुनावमा हार्नुभएका नेता गौतमलाई राष्ट्रिय सभामा लैजान किन परेको हो ? भनी पत्रकारहरुले जिज्ञासा राख्दा अध्यक्ष प्रचण्डले भन्नुभयो, ‘चुनावमा कहिले हार कहिले जित भइरहन्छ, पहिला हारेकाहरुलाई मैले केके बनाएँ भन्नेकुरा सबैलाई थाहा छ, नेकपाको सचिवालयमा सभा सदस्य नहुनु भएको उहाँमात्र हो । उहाँ पार्टी, देशलाई चाहिने नेता हुनुहु्न्छ ।’

हालका अर्थमन्त्री युवराज खतिवडा राष्ट्रिय सभा सदस्य नभए पनि ६ महिना मन्त्री हुन पाउने अधिकार नै रहेको अध्यक्ष प्रचण्डको भनाइ थियो । उहाँले भन्नुभयो, ‘६ महिनापछि के हुन्छ भन्नेतर्फ अहिले नलागौँ ।’ प्रधानमन्त्री र कांग्रेस नेता शेखर कोइरालाको भेटघाटको विषयमा अध्यक्ष प्रचण्डले नेताहरुसँग भेटघाट हुनु कुनै नौलो विषय नरहेको बताउनुभयो । उहाँले भन्नुभयो, ‘मैले पनि देउवाजीसँग भेटघाट गरेको छ, यो स्वभाविक प्रक्रिया हो ।’ 

पत्रकारसँग अध्यक्ष प्रचण्डले आफूले कुनै व्यापारीहरुसँग भेटघाट नगरेको बताउनुभयो । उहाँले भन्नुभयो, ‘मिडियामा आएजस्तो मेरो कुनै व्यापारीसँग भेटघाट भएको छैन, यो कपोलकल्पित हो, भ्रामक हो ।’