देवघाट ५ बन्यो नेपालकै पहिलो सुरक्षीत खानेपानी युक्त वडा, सबै घरमा शुद्ध खानेपानी

चितवन । तनँहुको देवघाट गाउँपालिका–५ लाई नेपालकै पहिलो सुरक्षित खानेपानी युक्त वडा घोषणा गरिएको छ । विभिन्न १० वटा सूचकहरु पूरा गरेपछि आज सो वडालाई नेपालकै पहिलो सुरक्षित खानेपानी युक्त वडा घोषणा गरिएको हो । वडा भित्र रहेका सवै घरमा शुद्ध खानेपानी पुर्याएपछि घोषणा गर्न सफल भएको देवघाट गाउँपालिकाका अध्यक्ष दुर्गबहादुर थापाले बताए ।

युनिसेफको आर्थिक सहयोग र उत्पीडित समुदाय विकास तथा अनुसन्धान केन्द्र (कोस्डर) गोरखाको प्राविधिक सहयोगमा सुरक्षित खानेपानी युक्त वडा घोषणा गरिएको उनको भनाई छ । सुरक्षित खानेपानी युक्त वडा घोषणा गर्नका लागि खुला दिशामुक्त क्षेत्र घोषणा, एक घर एक धारा, प्रत्येक घरमा खानेपानीको मिटर जडान र महसुल सङ्कलन, सरसफाइ तथा स्वच्छता कायम, खानेपानीको मर्मत सम्भार कोष स्थापना, समुदायमा खानेपानीको मर्मतसम्भारकर्ता, खानेपानी सुरक्षा योजना लगायतका विभिन्न सूचकहरु पूरा गरिएको थापाले बताए । त्यस्तै खानेपानीमा कोलिफर्म र आर्सेनिक नभएको, समुदायलाई खानेपानी गुणस्तर तालिम,  खानेपानी गुणस्तर अनुगमनपछि सुरक्षित खानेपानी युक्त वडा घोषणा गरिएको भएको हो ।

शुद्ध पानीकै लागि १ करोड खर्च,
सुरक्षित खानेपानी वडा घोषणाका लागी करिब एक करोड रुपैँया खर्च भएको गाउँपालिकाका प्रमुख प्रशासकीय अधिकृत रमेश सुवेदीले जानकारी दिए । वडा नम्बर ५ मा १० वटा खानेपानी उपभोक्ता समिति मार्फत सबै वडावासीको घरमा पाइपको माध्यमबाट खानेपानी पु¥याइएको सुवेदीको भनाइ छ । वडा नम्बर ५ का एक हजार ४ सय ५६ घरधुरीका आठ हजार ८ सय १५ परिवारले सुरक्षित पानी पिउन पाएको गाँउपालिकाले जनाएको छ ।

आइतबार घोषणा कार्यक्रममा युनिसेफ नेपालका निमित्त राष्ट्रिय प्रतिनिधि डा. तमिज अहमदले दिगो विकासका लागि समुदायले पिउने पानी शुद्ध हुनुपर्ने बताए । सुरक्षित खानेपानी वडा घोषणा गरेर वडामा राम्रो कामको सुरुवात भएको उल्लेख गर्दै अहमदले पानीको गुणस्तरलाई कायम राख्नका लागि युनिसेफले सधैँ सहयोग गर्ने बताए । यस्तै कोस्डर गोरखाकी खानेपानी गुणस्तर स्रोत व्यक्ति समृद्धि गुरुङले सन् २०१९ को अगष्टमा सुरु भएको परियोजना डिसेम्बर २०१९ मा सकिएको बताइन् ।

पटक पटकको अनुगमन र नजिताहरुको मूल्याङ्कन पश्चात पानी पिउनका लागि पूर्ण रुपमा सुरक्षित र गुणस्तर भएपछि मात्रै सुरक्षित खानेपानी युक्त वडा घोषणा गरिएको उनको भनाई छ । खानेपानीको मुहान वरिपरी संरक्षणको आवश्यकता, पाइपलाइनहरु फुटेर पानी दूषित हुने जोखिम, रिजर्भ ट्याङ्की वरिपरी सरसफाइको आवश्यकता, धाराहरु सफाइको आवश्यकता देखिएकाले गाउँपालिकाको ध्यानाकर्षण गराइएको छ ।