काठमाडौं । अदालतको अवहेलना गरेको आरोपमा पक्राउ परेका डाक्टर गोविन्द केसीको बयान इजलासमै हुने भएको छ ।
तर, केसीको मुद्दाको इजलास भने अहिलेसम्म तोकिएको छैन । केहीबेरमा इजलास तोकेपछि इजलासमै केसीको बयान हुने अधिवक्ता सुरेन्द्र भण्डारीले बताएका छन् ।
भण्डारीसँगै केसीका पक्षमा ओमप्रकाश अर्याल, बाबुराम गिरी, दिनेश त्रिपाठी, सुरेन्द्र भण्डारीलगायत वकिलले बहस गर्ने बताइएको छ ।
त्यसैगरी केसीको विपक्षमा रमण श्रेष्ठ, उपेन्द्रकेशरी न्यौपाने, श्याम खरेल, लक्ष्मण थपलिया र दीपक बिष्टले बहस गर्ने छन् । यद्यपी अहिलेसम्म बहसका लागि इजलास तोकिएको छैन ।
यसैवीच डा. गोविन्द केसीलाई असहज महसुस भएपछि एम्बुलेन्समा आराम गर्न दिइएको छ । सर्वोच्चको मुद्दा महाशाखाका प्रमुख नारायण पन्थीको कार्यकक्षमा राखिएका डा. केसीले केही असहज महसुस गरेको बताएपछि आराम गर्न एम्बुलेन्समा राखेर सर्वोच्च पछाडिको खालि स्थानमा राखिएको छ ।
हिजो अनसनस्थलबाटै पक्राउ परेका डा. केसीलाई आज बिहान सिंहदरवार प्रहरी वृत्तबाट सर्वोच्चमा लगिएको हो ।
प्रतिक्रिया दिनुहोस