चीन र भारत दुवैसँग सुमधुर सम्बन्ध छ: प्रधानमन्त्री ओली

काठमाडौँ । प्रधानमन्त्री केपी शर्मा ओलीले दुवै छिमेकी मुलुकसँग राम्रो सम्बन्ध रहेको दाबी गरेका छन् । मधेश प्रदेशसभालाई सम्बोधन गर्दै छिमेकी मुलुकसँग सम्बन्ध बिग्रियो भनेर चलेको हल्लामा कुनै सत्यता नभएको जिकिर गरेका हुन् ।

उनले भने, हाम्रा दुइटा छिमेकी मित्रहरू छन्, दुवैसँग सुमधुर सम्बन्ध छ । हल्ला गरिरहन्छन्, यहाँ सम्बन्ध बिग्रियो भनेर कहाँ बिग्रियो ? सम्बन्ध सँगै सुतेकैले हो खुट्टा बोकाउने अर्को बेडमा सुतेकाले खुट्टा बोलाउँदैन नि ! खुट्टो बोकाए हटाउन भन्नुपर्‍यो कुरा सकियो । अब छिमेकमै भएपछि गाई फुकेर बाली खाइदिन्छन्, टाढाको खान्छ र ? त्यसैले छिमेकमा कहिलेकाहीँ सानातिना समस्या आउन सक्छन्, कुरा गर्नुपर्छ । दुवै छिमेकीसँग राम्रो सम्बन्ध छ ।’

उनले खुला सिमानाका नाममा बेठिक गतिविधि भने दुवै तर्फबाट रोक्नुपर्ने बताए । यस्तै, उनले अरु पार्टीसँग पनि छलफल गरेर संविधान संशोधन गर्ने प्रधानमन्त्रीले बताए ।

उनले भने, ‘संविधानप्रति बफादार छु भनेर शपथग्रहण गर्ने, अनि संविधान भन्ने कुरा हुँदैन । यस व्यवस्थालाई व्यवस्थित गर्ने नै संविधानले हो । अब त्यो संविधानलाई समयको माग अनुसार परिमार्जन हुन्छन् । हाम्रो पनि देखिएको छ । हामीले गर्छौँ पनि ।’