डोल्पाको सदरमुकाममा नि:शुल्क स्वास्थ्य शिविर, १५ सय बढी लाभान्वित

काठमाडाैं । डोल्पाकाे जिल्ला अस्पताल दुनैमा निःशुल्क स्वास्थ्य शिविर सञ्चालन भएको छ । विभिन्न विशेषज्ञ डाक्टरहरुबाट सेवा दिने उदेश्यले शुक्रबार ब्याक टु लाइफ र हेरेन्डेक नेपालकाे सहयाेगमा दुनैमा निःशुल्क स्वास्थ्य शिविर सञ्‍चालन गरिएको हाे।

शिबिरमा  मुटु राेग,स्त्रीरोग, बालरोग, नाक, कान घाँटी, सामान्य/आन्तरिक रोग लगायतका सेवा राखिएकाे थियाे ।  मुटुराेग  विशेषज्ञ  डा. चन्द्रमणी अधिकारी, डा. अमृत बाेगटी,  डा, कृष्ण चन्द्र अधिकारी र  डा, विजय घिमिरे सहभागी थिए ।

४१९ जनाको निःशुल्क हृदय परीक्षण (२३० जनाकाे इकोकार्डियोग्राम र  ८५ जनाकाे इसीजी), उच्च रक्तचाप, मुटु रोग तथा छाती दुखाइसम्बन्धी परामर्श र उपचार गरिएको छ ।

स्त्रीरोग विशेषज्ञ नेतृत्व र रेडियोलोजिस्टको सहकार्यमा  स्त्रीरोग विशेषज्ञ डा. इच्छा उप्रेती र डा. कृष्ण बुढाथाेकीले प्रजनन स्वास्थ्य समस्याहरूको निदान तथा उपचार, पाठेघर खस्ने समस्याका लागि पेसेरी रिङ्ग राख्ने सेवा, परिवार नियोजन परामर्श दिइएकाे थियाे । ४७५ जनालाई स्त्रीरोग सम्बन्धी परामर्श तथा  ३५२ जनाकाे  युसीजी भिडियो एक्सरे गराइएकाे हाे ।

त्यसैगरी  बालरोग विशेषज्ञको नेतृत्वमा डा. रस्मिता श्रेष्ठ र  देविका खड्काले  दम, न्यूमोनिया जस्ता बालबालिकामा देखिने सामान्य रोगहरूको उपचार, बच्चाहरूको वृद्धिदर तथा विकास मूल्यांकन, अटिज्म स्पेक्ट्रम डिसअर्डर (ASD) तथा ADHD परीक्षण  गराइएकाे छ ।  २०३ जना बालबालिकालाई बालरोग सम्बन्धी परामर्श तथा उपचार गरिएको छ।

डा. अरुण केसीले नाक, कान घाँटी विशेषज्ञ/सर्जनको नेतृत्व गरेका थिए । ३४९ जनालाई कान, नाक, घाँटीसम्बन्धी रोगहरूको निदान तथा उपचार र सुन्ने क्षमता कम भएका २५ बिरामीहरूका सुन्ने क्षमताको जाच  गराइएकाे थियाे । २० जना बिरामीको कानको शल्यक्रिया चैत ५ र ६ गते हुनेछ ।

एमडी फिजिसियन/आन्तरिक रोग विशेषज्ञको नेतृत्वमा डा. करण राजबंशीले ५०३ जनालाई सेवा दिए । आन्तरिक रोगहरूको निदान, उपचार र रोकथाम, दीर्घकालीन तथा नसर्ने रोगहरूको उपचार, मधुमेह, श्वासप्रश्वाससम्बन्धी रोगहरूको उपचार, दम , निमाेनिया ब्रोंकाइटिस, पाचनप्रणाली सम्बन्धी समस्या समाधान, पेट दुखाइ तथा ग्यास्ट्राइटिस, कलेजो तथा आन्द्रासम्बन्धी समस्या, पाचन शक्ति कमजोर हुने समस्या संक्रामक तथा सामान्य रोगहरूको उपचार, तथा आवश्यक बिरामीको भिडियो एक्सरे पनि गरिएको  थियाे ।

शिविरमा १५९१  जनाले सेवा लिएका थिए ।उनीहरुकाे सबै चेकजाँच तथा औषधि वितरण नि:शुल्क गरिएको जिल्ला अस्पताल दुनै डोल्पा डा‍. अखण्ड उपाध्यायले जानकारी दिए ।