दीर्घकालीन विकासका लागि पूर्वाधार नीतिमा मुख्यमन्त्री कार्कीकाे जाेड

विराटनगर। कोशी प्रदेशका मुख्यमन्त्री हिक्मत कुमार कार्कीले पूर्वाधार नीति बनाएर विकास निर्माणलाई अगाडि बढाउन सके विकास दीर्घकालसम्म टिकाउ हुने बताएका छन् ।

आज मुख्यमन्त्री तथा मन्त्रिपरिषद्को कार्यालय कोशीले आयोजना गरेको पूर्वाधार नीति तर्जुमा कार्यक्रमलाई सम्बोधन गर्दै मुख्यमन्त्री कार्कीले नीति बनाएर काम गर्दा योजना आयोगको आवधिक योजना र सरकारका वार्षिक कार्यक्रमहरूसम्म तार्तम्य मिल्ने र यसले विकासलाई सही ढंगले अगाडि बढाउन सहयोग पुग्ने बताए ।

उनले भने, हाम्रा आवधिक योजना र नीतिहरु एकातिर सरकारका वार्षिक नीति र कार्यक्रम अर्कोतिर हुने परिपाटी मिल्न नसकेकाले यसलाई मिलाएर अगाडि लैजानुपर्ने अवस्था रहेको छ।, जलवायु परिवर्तनले गर्दा विकास निर्माणहरू नीति बनाएर नै गर्नुपर्ने आवश्यकता छ रहेको औल्याउँदै मुख्यमन्त्री कार्कीले जलवायु परिवर्तनलाई ख्याल नगर्दा विकास निर्माण निर्माणले विपत्ति निम्त्याएको बताए ।

विपत्ति र जलवायु परिवर्तनको जोखिमलाई आंकलन गरेर नीति बन्नुपर्ने कुरामा ध्यान जानुपर्ने बताउँदै मुख्यमन्त्री कार्कीले त्यसमा ध्यान दिन सके हाम्रा योजना हरु सफल हुने बताए। सडक र पुलहरू बनाउने बित्तिकै भत्किने अहिलेको अवस्था रहेकाले पनि पूर्वाधार नीति आवश्यक रहेको मुख्यमन्त्री कार्कीले औल्याए ।

मुख्यमन्त्री कार्कीले पूर्वाधार नीति राम्रो बनाउन सके विकास टिकाउ र दीर्घकालीन हुने उल्लेख गरे। विपत र जलवायु लाई ध्यान दिएर नै अहिलेको पूर्वाधार नीति बनाउनुपर्नेमा उनको जोड थियो। पूर्वाधार नीति तर्जुमा गोष्ठीमा कोशी प्रदेश सरकारका मन्त्री ,सचिव विज्ञहरूको सहभागिता रहेको छ।