सर्लाहीमा सधैँ रेबिज विरुद्धको भ्याक्सिन अभाव

सर्लाही । सर्लाहीको बरहथवा नगरपालिका–१४, हरिपुर्वाका १४ वर्षीय मुकेश बैठालाई यही फागुन १ गते छाडा कुकुरले टोक्यो। एक्कासि कुकुरले टोकेपछि उनी तत्काल बरहथवा नगर अस्पताल पुगिन्। तर, अस्पतालले भ्याक्सिन नहुँदा उनलाई फर्कायो। 

त्यसपछि मुकेशलाई निजी क्लिनिकमा लगियो। क्लिनिकमा ६५० तिरेर भ्याक्सिन लगाए। तीन–तीन दिनको अन्तरमा तीन मात्रा भ्याक्सिन लगाउनुपर्ने मुकेश दोस्रो मात्राका लागि नगर अस्पताल पुगे। तर, चिकित्सकले औषधि अझै नआएको भनेर फर्काए। फेरि निजी क्लिनिकबाटै दोस्रो मात्रा लगाए। बैठाले अन्तिम मात्रा भने नगर अस्पतालबाटै लगाउनु पाए। 

शुक्रबार अस्पताल परिसरमा भेटिएका उनले नेता र अस्पतालका चिकित्सकसँग हारगुहार गरेपछि एक मात्रा भ्याक्सिन पाएको बताए। अस्पतालले दुई सय लिने भ्याक्सिन बाहिर छ सय ५० तिर्नु पर्दा महँगो परेको उनले बताए। 

‘गाउँका मान्छेले झन्झट मानेर रेबिजको भ्याक्सिन लगाउँदैनन्। अस्पतालमा सधैँ छैन् भनेर फर्काउँछन्। बाहिर किनेर लगाउन सबैसँग पैसा हुँदैन। यहाँ दिनदिनै कुकुर, स्याल, बाँदर, बिरालोलगायतका जनावरले टोकिरहेको हुन्छ’, उनले भने। 

चिकित्सकले दश दिनसम्म टोक्ने जनावरको निगरानी गर्न भनेर पठाउने गर्दा धेरै जनाले भ्याक्सिन लगाउन नपाएको स्थानीय रामनरेश रायको अनुभव छ। ‘कुकुर, स्यालजस्ता जनावरले खेतमा काम गर्दै गर्दा, बाटो हिँड्दा हिँड्दै टोकेर भाग्छ,’ उनले भने, ‘त्यस्ता जनावरको निगरानी कसरी गर्नु’ राज्यले भ्याक्सिन पर्याप्त नदिँदा विपन्न स्थानीय मारमा परेको उनको भनाइ छ। 

ठाझैँ गोडैता नगरपालिका- ५, सिसौटिया निवासी ४५ वर्षकी जोगनी देवीलाई यही फागुन ३ गते खेतैमा स्यालले टोक्यो। दायाँ गोडामा चोट लाग्ने गरी स्यालले टोकेपछि उनलाई परिवारले तत्काल प्राथमिक स्वास्थ्य केन्द्र गोडैता पुर्‍याए। तर, उनले स्वास्थ्य केन्द्रमा भ्याक्सिन पाइनन्। चिकित्सकले १० दिनसम्म टोक्ने जनावरको निगरानी गर्नु र मर्‍यो भने सुई लगाउन आउनु भन्दै फर्काइदिए। 

त्यसपछि उनी लालबन्दी नगरपालिकाको एक निजी क्लिनिकमा पुगेर  भ्याक्सिन लगाइन्। प्राथमिक स्वास्थ्य केन्द्र बलरामा आएको औषधि १५ दिनमै सकिएकोले भ्याक्सिन लगाउन अन्तै पठाएको स्वास्थ्य केन्द्रका इन्चार्ज नितेशकुमार कुशवाहले जानकारी दिए। भ्याक्सिन जम्मा ४० भाइल मात्र आउने गरेको उनले बताए। भ्याक्सिन सकिएपछि अधिकांश स्वास्थ्य संस्थाहरूले बिरामीलाई अन्यत्र पठाउने गरेका छन्।