काठमाडौं । भन्सार विभागले सार्वजनिक गरेको पछिल्लो तथ्यांकअनुसार चालु आर्थिक वर्ष २०८१/८२ को पहिलो सात महिनामा (श्रावण–माघ) नेपालले ९८८ अर्ब रुपैयाँभन्दा बढीको सामान आयात गरेको छ। यो अघिल्लो आर्थिक वर्षको सोही अवधिको तुलनामा १०.०९ प्रतिशतले वृद्धि भएको हो। त्यस्तै, निर्यातमा उल्लेखनीय सुधार देखिएको छ। चालु आवको सात महिनामा नेपालले १२७ अर्ब रुपैयाँभन्दा बढीको सामान निर्यात गरेको छ, जुन अघिल्लो वर्षको तुलनामा ४६.५० प्रतिशतको उच्च वृद्धि हो। नेपालको कुल व्यापार घाटा भने अझै ठूलो छ।
माघसम्म व्यापार घाटा ८६१ अर्ब रुपैयाँभन्दा बढी पुगेको छ, जुन अघिल्लो वर्षको तुलनामा ६.२० प्रतिशतले बढेको हो। कुल वैदेशिक व्यापार १,११५ अर्ब रुपैयाँभन्दा माथि पुगेको छ, जुन गत वर्षको तुलनामा १३.३० प्रतिशतले वृद्धि भएको देखिन्छ। तर, आयात-निर्यात अनुपात भने झन् खस्किएको छ। अघिल्लो वर्षको पहिलो सात महिनामा आयात निर्यातभन्दा १०.३४ गुणा बढी थियो भने चालु आर्थिक वर्षमा यो अनुपात झरेर ७.७७ मा आएको छ।
त्यस्तै, कुल वैदेशिक व्यापारमा निर्यातको हिस्सा ११.४० प्रतिशत पुगेको छ, जुन अघिल्लो वर्षको तुलनामा २९.३० प्रतिशतले वृद्धि भएको हो। तर, कुल व्यापारमा आयातको हिस्सा भने ८८.६० प्रतिशतमा झरेको छ, जुन अघिल्लो वर्षको तुलनामा २.८३ प्रतिशतले घटेको देखिन्छ। व्यापार घाटा उच्च रहे पनि निर्यात वृद्धिको दर सकारात्मक संकेत हो। उत्पादन प्रवर्द्धन, औद्योगिक विकास र निर्यातमुखी नीति अवलम्बन गर्न सके व्यापार असन्तुलन घटाउने सम्भावना देखिन्छ।
प्रतिक्रिया दिनुहोस
सफल खबर संवाददाता
विहीबार, ०८ फागुन २०८१, १३ : ४६
लेखकबाट थप