इजरायली प्रधानमन्त्री नेतन्याहू अमेरिका भ्रमणमा

वासिङटन डीसी । इजरायली प्रधानमन्त्री बेन्यामिन नेतन्याहू अमेरिका  भ्रमणको क्रममा वासिङ्टन आइपुगेका छन् । नेतान्याहूले मंगलबार अमेरिकी राष्ट्रपति डोनल्ड ट्रम्पलाई भेट्ने कार्यक्रम छ ।

ट्रम्प र नेतन्याहुबिचको यो बैठकमा यतिबेला सारा संसारको नजर छ । नेतन्याहूलाई भेट्नुअघि ट्रम्पले गाजामा शान्तिको कुनै ग्यारेन्टी नभएको भन्दै ठुलो बयान दिएका थिए । नेतान्याहूले आफ्नो गठबन्धनका दक्षिणपन्थी गुटहरूबाट पनि भारी दबाबको सामना गरिरहेको समयमा ट्रम्पको यो अभिव्यक्ति आएको हो । दक्षिणपन्थी गुटहरूले गाजामा युद्धविराम अन्त्य गर्न माग गरिरहेका छन् ।

समस्यामा नेतान्याहू

ट्रम्प र नेतान्याहूबिचको भेटमा इजरायल र साउदी अरेबियाबिच सम्बन्ध स्थापना गर्ने सम्भावनाहरूबारे पनि छलफल हुन सक्ने भनिएको छ । यसका साथै, बन्धकहरूलाई रिहा गर्ने सम्झौताको दोस्रो चरणलाई अन्तिम रूप दिनेबारे पनि वार्ता हुन सक्ने भनिएको छ । इजरायलमा नेतान्याहूको लोकप्रियता निरन्तर घट्दै गएको बेला उनी अमेरिका भ्रमणमा निस्किएका छन् ।

नेतान्याहूमाथि भ्रष्टाचारको पनि आरोप लागेको छ । तर, यी आरोपहरूलाई नेतान्याहूले पूर्ण रूपमा अस्वीकार गर्दै आएका छन् । यस्तो अवसरमा ट्रम्पलाई भेटेर आफ्नो लोकप्रियतामा आएको कमी रोक्न सकिने आशा नेतन्याहुले गरेका छन् । ट्रम्प इजरायलमा धेरै लोकप्रिय छन् ।

पश्चिम एसिया मामिलाका लागि अमेरिकी विशेष प्रतिनिधिले गाजामा युद्ध विराम सम्झौताको दोस्रो चरणमा वार्ता सुरु गरिसकेका छन् । तर इजरायलमा धेरै मानिसहरू हमाससँग शान्ति सम्झौताको पक्षमा छैनन् । हमास पूर्ण रूपमा स्वतन्त्र नभएसम्म कुनै पनि शान्ति सम्झौता हुनु नहुने र यो युद्ध रोकिनु नहुनेमा उनीहरूको विश्वास छ । 

युद्धविराम वार्ता जारी रहेमा सरकारबाट समर्थन फिर्ता लिने धम्की नेतन्याहूका सरकारका सहयोगीहरूले पनि दिएका छन् । दोस्रो चरणमा गाजाबाट इजरायली सेनाको पूर्ण फिर्ता हुन सक्ने बताइएको छ । बन्धक बनाइएकाहरूका परिवारहरूले सरकारलाई सम्झौताको लागि दबाब दिइरहेका छन् ।