दिल्ली विधानसभा चुनावअघि आम आदमी पार्टीका ८ विधायक बीजेपी प्रवेश

काठमाडौं। दिल्ली विधानसभा चुनावअघि आम आदमी पार्टी (आप)का ८ विधायक भारतीय जनता पार्टी (बीजेपी)मा प्रवेश गरेका छन् । ३१ जनवरीमा आम आदमी पार्टीबाट राजीनामा दिएका उनीहरू शनिबार भाजपामा प्रवेश गरेका हुन् ।

भाजपा प्रदेश अध्यक्ष वीरेन्द्र सचदेवा र प्रदेश इन्चार्ज बैजयन्त पाण्डाको उपस्थितिमा उनीहरू पार्टी प्रवेश गरेको भारतीय सञ्चार माध्यमहरूले जनाएका छन् ।

बीजेपीमा सामेल भएका विधायकहरूमा जनकपुरी विधायक राजेश ऋषि, पालम विधायक भावना गौर, बिजवासन विधायक बीएस जुन, त्रिलोकपुरी विधायक रोहित महरौलिया, कस्तुरबा नगर विधायक मदनलाल, महरौली विधायक नरेश यादव, मादीपुर छन् । गिरीश सोनी र आदर्श नगर विधायक पवन शर्मा हुन्।

राजीनामा दिने विधायकहरूले आम आदमी पार्टी र अरविन्द केजरीवालमाथिको विश्वास गुमेको बताएका छन् । उनीहरूले राजीनामा दिने क्रममा आम आदमी पार्टीलाई भ्रष्टाचारको आरोप लगाएका थिए । तर, यसपटक सबैलाई ‘आप’बाट टिकट नदिइएकाले पनि उनीहरू पार्टी हाईकमान्डसँग आक्रोशित भएको बताइएको छ ।

दिल्ली विधानसभा चुनावअघि उनीहरूको राजीनामाले यो राजीनामाले आम आदमी पार्टीको चुनावी रथमा कस्तो प्रभाव पार्छ भन्ने चर्चा शुरू भएको छ । राष्ट्रिय राजधानी दिल्लीमा ५ फेब्रुअरीमा विधानसभा चुनावको लागि मतदान हुँदैछ ।

२०२० को विधानसभा चुनावमा आम आदमी पार्टीले ७० मध्ये ६२ सिट जितेको थियो, जबकि भाजपाले आठ सिट र कांग्रेसले खाता पनि खोल्न सकेको थिएन ।