अमेरिकी विमान दुर्घटना : खतरनाक अवस्थाका कारण गोताखोरहरूले रोके काम

वासिङ्टन डीसी । बुधबार राति अमेरिकामा अमेरिकन एयरलाइन्सको विमान हावामै ब्ल्याक हक हेलिकप्टरसँग ठोक्किएको थियो । यस दुर्घटनामा विमानमा सवार ६४ जना यात्रु र क्रु मेम्बरको मृत्यु भएको छ । ठोक्किएपछि विमान पोटोम्याक नदीमा खसेको थियो ।

नदीमा मानिसहरूको शव फेला पार्न खोजी अभियान सुरु गरिएको थियो । तर अब खतरनाक अवस्थाका कारण डाइभिङ टोलीले यो अपरेशन रोकेको खबर आएको छ । यो जानकारी बीबीसीको अमेरिकी साझेदार सीबीएस न्यूजले दिएको हो । आफूहरूले सुरक्षित रूपमा पुग्न सक्ने सबै ठाउँहरू खोजेको गोताखोरहरूले बताएका छन् ।

गोताखोरहरूले विमान दुर्घटनामा मारिएकाहरूको शव खोज्न सकुन् भनेर अमेरिकी तटरक्षक दल नदीबाट विमानको भग्नावशेष हटाउन मद्दत गर्न तयार छ । नदीमा दुर्घटनाग्रस्त विमानको भग्नावशेष हटाइएपछि र अवस्था सुरक्षित भएपछि, गोताखोरहरूले आफ्नो काम पुनः सुरु गर्ने बताइएको छ ।