कोरियाका अपदस्थ राष्ट्रपति यूनलाईलाई गिरफ्तार गर्ने दोस्रो प्रयास

काठमाडौं। महाभियोग लागेपछि अपदस्थ भएका दक्षिण कोरियाका राष्ट्रपति युन सुक योएलविरुद्ध दोस्रोपटक पक्राउ पूर्जी जारी गरिएको छ । पहिलो पटकको गिरफ्तारी प्रयास असफल भएपछि दोस्रो पूर्जी जारी भएको हो । यससँगै कारण उनलाई पक्राउ गर्ने प्रयास थप तीव्र र विवादास्पद बन्ने संकेत देखिएको छ ।

उच्च पदस्थ अधिकारीहरूको भ्रष्टाचार अनुसन्धान गर्ने निकाय सीआईओका एक उच्च अधिकारीले युनलाई गिरफ्तार गर्न सबै उपाय प्रयोग गर्ने घोषणा गरेका छन् ।उनले राष्ट्रपतिको सुरक्षाको लागि तैनाथ भएका सुरक्षाकर्मीको घेरालाई तोडेर पनि युनलाई हिरासतमा लिने प्रतिबद्धता जनाएका छन् ।

यससँगै राष्ट्रपतिको पक्ष र विपक्षमा रहेका प्रदर्शनकारीहरू कठ्यांग्रिने जाडो हुँदाहुँदै पनि सियोलको राष्ट्रपति निवास वरपर सडकमा उत्रिएका छन् । प्रदर्शनकारीहरूले युनको गिरफ्तारीलाई लिएर विभाजित धारणा राखेका छन् ।

राष्ट्रपति सुरक्षा सेवा(पीएसएस)ले यस हप्ताभर राष्ट्रपति निवासलाई काँडेतार, बस र अन्य अवरोधक सामान प्रयोग गरेर चारैतिरबाट घेराबन्दी गरेको छ । 

सियोलको 'कोरियाली बेभर्ली हिल्स'मा रहेको यो निवास अत्यन्त सुरक्षित राखिएको छ ।

गत साता सीआईओले अदालतबाट प्राप्त गरेको पहिलो पूर्जीका आधारमा युनलाई हिरासतमा लिने प्रयास गरेको थियो । तर, उनको सुरक्षा टोलीको टोलीको कडा प्रतिरोधका कारण असफल भएको थियो ।

युनमाथि गत ३ डिसेम्बरमा सैनिक शासन लागू गर्ने असफल प्रयाससँगै राजद्रोहको आरोप लागेको छ । महाभियोग लागेका राष्ट्रपतिविरुद्ध यसप्रकारको गिरफ्तारी वारेन्ट कोरियाको इतिहासमा पहिलोपटक जारी भएको त्यहाँका सञ्चारमाध्यमहरूले जनाएका छन् । 

युनको गिरफ्तारी प्रयासले दक्षिण कोरियाको राजनीतिक वातावरणलाई थप तनावग्रस्त बनाएको छ । सीआईओ र सरकारी सुरक्षा निकायहरू अब राष्ट्रपति युनलाई हिरासतमा लिने प्रयासमा अघि बढ्ने तयारी गरिरहेका छन् ।