एआईजी केदार ढकाल अवकाशमा

काठमाडौँ । प्रहरी अतिरिक्त महानिरीक्षक (एआईजी) केदार ढकाल अवकाशमा गएका छन् । प्रहरी प्रधान कार्यालयस्थित प्रदेश समन्वय विभागमा कार्यरत ढकालले मङ्सिर २१ बाट अवकाश पाएका हुन् ।

उनी प्रहरी महानिरीक्षक वसन्त कुँवरसँगै २०५१ चैत ५ मा प्रहरीमा प्रवेश गरेका थिए । एआईजीको ५६ वर्षे उमेर हद पुरा गरेर ढकाल अवकाशमा गएका हुन् । प्रहरी नियमावली–२०७१ अनुसार डीआईजी तथा एआईजीहरू ५६ वर्ष उमेर पुरा भएपछि अवकाशमा जान्छन् । नेपाल प्रहरीका अर्का एआईजी भिमप्रसाद ढकाल पनि यसै महिना अवकाशमा जाँदै छन् । 

२०५२ भदौ १९ मा प्रहरी सेवामा प्रवेश गरेका ढकाल मङ्सिर २७ मा अवकाश हुँदैछन् । ढकालले आईजीपी कुँवरसँगै नाम निकाले पनि ६ महिना ढिला नियुक्ति पाएका थिए ।

उपत्यका प्रहरी कार्यालयकी प्रमुख (एआईजी) किरण बज्राचार्य पनि अर्को महिना अवकाशमा जान लागेकी छन् । उनी पुस १५ मा अवकाशमा जाने प्रहरी प्रधान कार्यालयका एक जना अधिकृतले बताए । उनी आईजीपी कुँवरसँगै प्रहरीमा प्रवेश गरेकी हुन् । बज्राचार्य पनि उमेर हदका कारण अवकाश हुन लागेकी हुन् ।

भीम ढकालको अवकाशसँगै प्रहरीमा दुई वटा एआईजीको दरबन्दी रिक्त हुनेछ । रिक्त दरबन्दीमा दुई जना डीआईजीलाई बढुवा गर्ने गरी प्रहरी प्रधान कार्यालयले तयारी गरेको छ । प्रहरीका एक जना उच्च अधिकृत भन्छन्, ‘भीम ढकाल अवकाश हुनुभन्दा एक साताअघि बढुवा सिफारिस गर्न मिल्ने कानुनी व्यवस्था भएको हुनाले तत्काल बढुवा सिफारिस हुने सम्भावना देखिन्छ ।’