शिक्षामा आमुल परिवर्तनको आवश्यकता छ : मन्त्री पोखरेल

जनकपुुरधाम । शिक्षा विज्ञान तथा प्रविधीमन्त्री गिरिराजमणी पोखरेलले शिक्षामा आमुल परिवर्तनको आवश्यकता रहेको बताएका छन् । शनिबार महोत्तरी जिल्लाको गौशालामा भएको एक कार्यक्रममा उनले शिक्षाले उत्पादन मात्रै गर्ने गरेकोले यसलाई परिमार्जन जरुरी रहेको बताए । 

उनले शिक्षालयको रुपमा रहेको विश्वविद्यालय अर्थात उद्योगको नीति नै त्रुटिपूर्ण रहेको बताएका छन् । उनले कमजोर विद्यार्थीलाई शिक्षण पेशामा संलग्न गराउने तथा भर्ना लिने विश्वविद्यालयको नीतिलाई नै परिवर्तन गरेर शिक्षामा आमूल परिवर्तनको आवश्यकता रहेको बताए ।

गौशाला नगरपालिकामा आयोजित उच्च शिक्षा विषयक अन्तरक्रिया कार्यक्रममा बोल्दै मन्त्री पोखरेलले भने, ‘शिक्षक शिक्षणकला महत्वपूर्ण पाटो भएकोले शिक्षकले आफ्नो जागिरे मानसिकता त्यागेर शिक्षण पेशालाई अँगाल्न जरुरी रहेको छ । जसरी राजनीति आन्दोलनबाट देशमा आमूल परिवर्तन भयो, सोही अनुरुप शिक्षणमा समेत शिक्षा आन्दोलनबाट आमूल परिवर्तनको आवश्यकता रहेको छ ।’