एकीकृत समाजवादीका नेताको कार्य विभाजन शुक्रवार

काठमाडौँ । नेकपा (एकीकृत समाजवादी) ले नेताहरूको कार्य विभाजन शुक्रवार बस्ने कार्यदलको बैठकमार्फत टुङ्गो लगाउने भएको छ । असार तेस्रो साता पार्टीको दशौँ महाधिवेशन गरेको सो पार्टीले झन्डै ५ महिनापछि नेताहरूको कार्य विभाजन गर्न लागेको हो ।

जसमा प्रदेश इन्चार्ज, जिल्ला इन्चार्ज, विभागीय प्रमुख, आयोग र जनसङ्गठन इन्चार्जलगायतको जिम्मेवारी तोक्न बाँकी छ । महाधिवेशनमा असन्तुष्ट रहेका नेताहरूलाई समेत समेटेर कार्य विभाजन गर्न लागेको नेताहरूले बताउँदै आएका छन् ।

नेता जीवनराम श्रेष्ठ, डा.विजय पौडेल, रामकुमारी झाँक्री लगायतका नेताहरूले पार्टीमा उचित जिम्मेवारी बाँडफाँड हुन सकेको भन्दै असन्तुष्टि जनाउँदै आएका छन् ।

सो पार्टीले सबै तहका कमिटीमा ‘एक पद एक व्यक्ति’ प्रणालीका आधारमा कार्य विभाजन गर्ने बताउँदै आएको छ ।  सङ्गठनलाई थप सुदृढीकरण गरी गतिशील बनाउन पार्टीका सबै तहका नेतालाई व्यवस्थापन गर्न ‘एक पद एक व्यक्ति’को अवधारणा कार्यान्वयन गर्न लागिएको नेता सोमप्रसाद पाण्डेले जानकारी दिए ।

पार्टी संरचनामा कार्य विभाजन गर्न अध्यक्ष माधवकुमार नेपालको नेतृत्वमा सम्मानित नेता झलनाथ खनाल, महासचिव घनश्याम भुसालसहित सात पदाधिकारीको कार्यदल गठन गरिएको थियो ।