गोलभेँडाको मूल्य हालसम्मकै उच्च, थोकमै प्रतिकिलो १८० रुपैयाँ

काठमाडौं। पछिल्ला केही दिनयता काठमाडौं उपत्यकामा तरकारीको मूल्य आकासिएको छ । त्यसमा पनि गोलभेँडाको मूल्य अत्यधिक बढेको छ । उपत्यकामा गोलभेँडाको मूल्य बढेर थोकमै प्रतिकेजी १८० रुपैयाँ पुगेको छ । मागअनुसार गोलभेँडाको आपूर्ति हुन नसक्दा मूल्य बढेको कालीमाटी फलफूल तथा तरकारी बजार विकास समितिले जनाएको छ ।

खुद्रामा गोभेँडाको मूल्य प्रतिकेजी दुई सयदेखि २५० सम्ममा किनबेच भइरहेको छ । समितिका अनुसार केही दिनअगाडि देशभर आएको अविरल वर्षाले गोलभेँडा खेतीमा क्षति पुगेकाले मूल्य उच्च भएको हो । यसअघि गोलभेँडाको मूल्य यति धेरै महँगिएको थिएन ।

अहिले कालीमाटी बजारमा गोलभेँडाको मूल्य प्रतिक्रेट तीन हजारदेखि तीन हजार पाँच सयसम्म पुगेको छ । तिहारपछि विस्तारै गोलभेँडाको मूल्य घट्ने अनुमान छ ।