चितवन । चितवन मेडिकल कलेजले दश हजारभन्दा बढी मुटु रोगका बिरामीको शल्यक्रिया गरेको छ । स्थापना भएदेखि हालसम्म कलेजले क्याथल्याबबाट १० हजार २ सय ५० जनाको शल्यक्रिया गरिएको आज (आइतबार) पत्रकार सम्मेलन गरी जानकारी दिएको छ । कलेजका अनुसार शल्यक्रिया गरिएका मध्ये पाँच हजार १७३ जनाको मुटुमा जाली हालिएको छ । त्यस्तै ७१८ जनाको मुटुमा ब्याट्री राखिएको कलेजका कार्यकारी निर्देशक प्रताप देवकोटाले जानकारी दिए । ३०७ वटा मुटुको भल्व खोल्ने, २ हजार १९२ वटा मुटुमा आउने नसाको शल्यक्रिया र १ हजार ८६० जनाको मुटुको जाँच गरिएको उनले बताए ।
चितवन मेडिकल कलेजमा २०६९ सालबाट मुटुरोग विभाग स्थापना गरिएको थियो । सिटिभिएस मार्फत हालसम्म १ हजार ३०० जनाको शल्यक्रिया गरिएको छ । सिटिभिएस भनेको कार्डियो भास्कुलर थेरापिक सर्जरी हो । यो अवधिमा सात दिनको बच्चादेखि ७८ वर्षको बुद्धसम्मको शल्यक्रिया गरिएको कार्यकारी निर्देशक देवकोटाले जानकारी दिए ।
मेडिकल कलेजले न्यूक्लियर कार्डियोलोजी सेवा समेत दिँदै आएको छ । यसले मुटुको काम गर्ने क्षमता नाप्ने काम गरिन्छ । बालबालिकाहरुको मुटु रोग पहिचान र निदान गर्नका लागि मेडिकल कलेजले बाल मुटुरोगको छुट्टै युनिट स्थापना गरिएको जनाएको छ । नेपालमा हरेक वर्ष जन्मजात ६ हजार मुटुरोगका शिशुको जन्म हुन्छ । समयमा उपचार पाए यस्ता विरामी ९९ प्रतिशत निको हुने डाक्टर उदित मिश्रले जानकारी दिए । उनका अनुसार बयस्कहरुमा हुने मुटुरोग जीवनशैलीको कारण लाग्छ भने बाल मुटुरोग धेरैजसा जन्मजात तथा अन्य समस्याले हुने गर्दछ ।
मानिसहरुको जिवनशैलीका कारण मुटुरोगका बिरामी बढ्दै समेत गएका छन् । यस कलेजमा मात्रै दैनिक दुई सय जना मुटुरोग सम्बन्धी समस्या लिएर आउने गरेको मुटुरोग विशेषज्ञ प्रा.डा. श्यामराज रेग्मीले जानकारी दिए । उनका अनुसार सूर्तीजन्य पदार्थको प्रयोग, अस्वस्थ खानपान, मोटोपन, शारीरिक निस्क्रियता, मदिराजन्य वस्तुको प्रयोग, वायू प्रदुषण, मानसिक तनावका कारण मुटुमा समस्या हुने गर्दछ । यी विषयमा ध्यान दिएमा ८० प्रतिशत मुटुरोगीहरुले अकालमा मृत्युवरण गर्न नपर्ने उनले बताए ।
प्रतिक्रिया दिनुहोस
सफल खबर संवाददाता
आइतबार, १३ असोज २०८१, १४ : २८
लेखकबाट थप
सम्बन्धित समाचारहरु
चितवन मेडिकल कलेजमा आजदेखि स्वास्थ्य बीमा लागू
चितवन मेडिकल कलेज क्षेत्र विस्तार अभियानमा, मर्ज गरेर सुरु भो सिएमसी चुरेहिल हस्पिटल
चितवन मेडिकल कलेजमा स्तन क्यान्सरको बहिरङ्ग सेवा निःशुल्क