पाकिस्तानको खैबर पख्तुनख्वामा पहिरो, एकै परिवारका १२ जनाको मृत्यु

इस्लामावाद । पाकिस्तानको खैबर पख्तुनख्वा प्रान्तमा भारी वर्षापछि आएको पहिरोमा परेर एकै परिवारका १२ जनाको मृत्यु भएको छ । भारी वर्षाका कारण सो परिवार बस्दै आएको कच्ची घरको छाना खसेको माथिल्लो डीर जिल्लाका राहतकर्मीले बताएको भन्दै बीबीसीले समाचार छापेको छ ।

दुर्घटनाको समयमा परिवारका सदस्यहरू सुतिरहेका थिए ।भग्नावशेषबाट निकालिएकामध्ये यस परिवारका नौ जना बालबालिकाको शव रहेको बताइएको छ ।

खैबर पख्तुनख्वामा विगत एक महिनादेखि भारी वर्षा भइरहेको छ । जसका कारण बाढीले यहाँको एउटा ठूलो पुल पनि बगाएको छ । पहिरोका कारण काराकोरम राजमार्गको एक भाग पनि बन्द भएको छ ।