ढाका । बङ्गलादेशमा सरकारी जागिरमा आरक्षणको व्यवस्थाको विरोधमा प्रदर्शन उग्र हुँदै गएको छ । प्रदर्शनबिच पूर्व प्रधानमन्त्री शेख हसिनाले राजीनामा दिएको दिनमा सोमबार एकै दिन १३५ जनाको मृत्यु भएको छ ।
प्रदर्शनकारीहरूले अस्पताल, होटेल र सडकमा आगजनी गरेका थिए । यसबाहेक हसिनाको पार्टी आवामी लिगका सांसद र नेताका घरमा तोडफोड भयो । कयौँ जिल्लामा आवामी लिगका नेताको हत्या गरिएको छ । हिंसापछि पूरै देशमा अराजकता र अशान्तिको स्थिति छ ।
सञ्चारमाध्यमका अनुसार ढाकाबाहिर सावर र धमराई क्षेत्रमा प्रहरी र प्रदर्शनकारीबिच भएको गोलीबारीमा १८ जनाको मृत्यु भएको थियो । अश्रुग्यास र गोली प्रहारबाट अरु ५० जना घाइते भएका छन् ।
उत्तरा क्षेत्रमा प्रहरी चौकीले प्रदर्शनकारीमाथि गोली चलाउँदा अरु १० जनाको मृत्यु भएको थियो । गोली चलेपछि आक्रोशित बनेका प्रदर्शनकारीहरूले प्रहरी चौकी घेरा हालेर आगजनी गरेका थिए । ढाकाका विभिन्न अस्पतालले ७८ जनाको मृत्यु भएको पुष्टि गरेको छ ।
हबिगञ्जमा प्रदर्शनकारी र प्रहरीबिच भएको हिंसात्मक झडपमा ६ जनाको मृत्यु भएको छ । यस क्रममा एक सय जना घाइते भए । प्रहरीको गोली लागेर तंगेलमा दुई र धनबारीमा एक जनाको मृत्यु भएको थियो । त्यहाँ अरु ४० जना घाइते भएका छन् । लक्ष्मीपुर क्षेत्रमा भएको हिंसामा ११ जनाको मृत्यु भयो भने ३५ जना घाइते भएको बताइएको छ । पूर्व युवा नेताको घर अगाडि सात जनाको शव भेटिएको थियो । कुश्तियामा एक किशोर सहित ६ जनाको मृत्यु भएको छ । सतखीरामा पनि तीन जनाको मृत्यु भएको छ ।
अवामी लिगका महासचिवको होटेलमा आगलागी, आठ जनाको मृत्यु
जेस्सोरमा अवामी लिगका महासचिव शाहीन चक्लादारको होटेलमा आगजनी हुँदा आठ जनाको जलेर मृत्यु भएको छ भने ८४ जना घाइते भएका छन् । यसबाहेक चित्तमोरमा एउटा होटेलमा आगजनी भएको छ । खुल्नामा अवामी लिगका अध्यक्ष जीएम मोहसिन रजा, उनका ड्राइभर आलमगीर र निजी सहायक मोफिजुल इस्लामलाई भीडले कुटपिट गरी मारेका छन् ।
पूर्व मेयरलाई जलाएर मारियो
हिंसात्मक प्रदर्शन चर्किरहँदा बरिसालमा पूर्व मेयर तथा अवामी लिगका अध्यक्ष सेर्नियाबत सादिक अब्दुल्लाहको जलाएर हत्या गरिएको छ । यसबाहेक थप दुई जनामा आगो लगाइएको छ । गाजीपुरको सफीपुरमा सीमा रक्षक बंगलादेशी सैनिकले आक्रमणकारीमाथि गोली चलाएको छ । अरु २ जनालाई पनि आगो लगाइएको थियो । प्रदर्शनकारीहरूले अवामी लिग पार्टीका सांसद, मन्त्रीको घरको साथै प्रहरी चौकीमा आगजनी गरेका छन् ।
त्यसैगरी नौगाउँस्थित खाद्यमन्त्री साधनचन्द्र मजुमदारको घरमा पनि तोडफोड र आगजनी गरिएको छ । नरैलमा सांसद मशरफी मुर्तजाको घरमा तोडफोड भएको छ । यहाँ अवामी लिगको कार्यालयमा आगजनी गरियो र अध्यक्ष सुभाषचन्द्र बोसको घरमा तोडफोड गरियो। नारायणगञ्जमा सांसद शमीम उस्मान र अवामी लिगको कार्यालयमा तोडफोड भएको छ । कोमिल्लामा सांसद बहाउद्दीन बहारको घरमा आगजनी भएको छ । आवामी लिगको अन्य कयौँ सांसद र र उच्च पदस्थ अधिकारीको घर, पार्टी कार्यालयमा पनि तोडफोड र आगजनी भएको छ ।
शेरपुर जेलबाट ५ सय कैदी फरार
जिल्ला कारागारभित्र पसेर प्रदर्शनकारीहरूले त्यहाँका ५ सय कैदीलाई भगाएका छन् । चटगाउँसहित ६ प्रहरी चौकीमा आक्रमण गरेर आगजनी गरिएको छ । चटगाउँ, पटेंगा, ईपीजेड, कोतवाली, अकबर शाह र पहाडाली प्रहरी चौकीमा भीडले आक्रमण गरेको थियो । आक्रमणमा कयौँ प्रहरी घाइते भएका छन् ।
प्रतिक्रिया दिनुहोस
सफल खबर संवाददाता
मंगलबार, २२ साउन २०८१, १३ : ०४
लेखकबाट थप
सम्बन्धित समाचारहरु
बङ्गलादेशमा जमात–ए–इस्लामीमाथिको प्रतिबन्ध फुकुवा
बङ्गलादेशमा १३ वर्षयताकै उच्च मूल्यवृद्धि, नयाँ सरकारलाई चुनौती
बङ्गलादेशमा युनुसद्वारा अन्तरिम सरकारको नेतृत्व ग्रहण
बङ्गलादेशमा अवामी लिगका २० नेताको शव भेटियो
बङ्गलादेशमा बन्यो नयाँ सरकार
बङ्गलादेशमा सत्ता उलटपुलट अपडेटः रिहा भएका राजनीतिक बन्दीको पर्खाइमा परिवार