करिब ८ सय नेपाली विद्यार्थीले छाडे बंगलादेश

काठमाडौ । बंगलादेशमा विद्यार्थी आन्दोलन हिंसात्मक बन्न थालेपछि झण्डै ८ सय नेपाली विद्यार्थीले बंगलादेश छाडेको सरकारले जानकारी गराएको छ। 

परराष्ट्र मन्त्रालयले शनिबार ढाका विमानस्थल र सम्बन्धित सीमा नाकाहरूबाट विद्यार्थीहरूलाई सुरक्षित नेपाल फर्कन समन्वय भइरहेको जानकारी पनि दिएको छ।

सरकारी जागिरमा आरक्षणको विरोध गर्दै भएको प्रदर्शनले हिंसात्मक रूप लिएपछि बंगलादेश छाड्नेको संख्या बढेको छ। त्यस क्रममा नेपाली विद्यार्थी पनि स्वदेश फर्कन थालेका हुन्।

‘बंगलादेशका विश्वविद्यालय तथा सम्बन्धित कानुन कार्यान्वयन गर्ने निकायहरूसँग नजिकबाट समन्वय गर्दै आएको छ,’ परराष्ट्र मन्त्रालयले भनेको छ।