आलोचनापछि मन्त्री किराँतीको प्रष्टीकरण - अतिवादलाई परास्त गरौं भनेको हुँ

काठमाडौं। संस्कृति पर्यटन तथा नागरिक उड्डयन मन्त्री सुदन किराँतीले क्रिश्चियन धर्मबारे आफूले असहिष्णु बयान नदिएको बताएका छन् ।एक कार्यक्रममा मन्त्री किराँतीले ‘क्रिश्चियनलाई नमान्नु संविधान नमान्नु हो । संविधान नमान्ने देशद्रोही हुन् । उनीहरूलाई हतकडी लगाएर जेल हाल्नुपर्छ’ भनेर दिएको अभिव्यक्ति विवादित बनेको थियो ।

जिम्मेवार मन्त्रालयमा बस्नेले सांस्कृतिक भड्काउ आशयको अभिव्यक्ति दिएपछि किराँतीको आलोचना भएको थियो । त्यसपछि उनले सामाजिक सञ्जालमा लेख्दै आफ्नो जोड अतिवादलाई परास्त गरौं भन्ने रहेको बताएका हुन् ।

‘बहसको लागि सबैलाई धन्यवाद ’!  संविधानलाई पालना गर्दै भ्रातृत्व र सहिष्णुता कायम गरौं ! अतिवादलाई परास्त गर्दै राष्ट्रिय एकता कायम गरौं भन्ने मेरो जोड हो,' उनले लेखेका छन्, ​'भन्‍नलाई त मलाई : पशुपतिनाथ सफा गर्दा हिन्दू भने, बौद्ध दर्शनको वकालत गर्दा बुद्धिस्ट भने, मुस्लिमको कार्यक्रममा जाँदा मुस्लिम भने, क्रिष्‍टियनको कार्यक्रममा जाँदा क्रिश्चियन भने, फेरि पनि भन्छु अहिले म सबैको अभिभावक हुँ त्यसैले सबै अस्तित्वको सम्मान गर्छु र सबैले गरौं । अन्तमा अर्काको अस्तित्वलाई स्वीकार गर्नु भनेको आफ्नो अस्तित्व सम्मानित हुनु हो ।’

किराँतीको अभिव्यक्तिपछि राप्रपा, रास्वपासहितका दलले आपत्ति जनाएका छन् । रास्वपा सभापति रवि लामिछानेले उनको राजीनामा नै मागेका छन् ।सामाजिक सञ्जाल प्रयोगकर्ताले पनि किराँतीको अभिव्यक्तिको विरोध गरेका छन् ।