ताप्लेजुङको उच्च हिमाली क्षेत्रमा हिमपात, किसान खुसी

ताप्लेजुङ। ताप्लेजुङको उच्च हिमाली क्षेत्रमा  हिमपात भएको छ । बिहीवार साँझ वर्षा भएसँगै सामान्य हिमपात हुँदा किसान खुसी भएका  छन् ।ओलाङ्चुङगोला, याङमा घुन्सा, लेलेप, गयाब्ला, फलेलगायतका बस्तीमा सामान्य हिमपात भएको फक्ताङलुङ गाउँपालिका–६ घुन्साका टासी तेन्जिङले बताए । सामान्य हिमपात भएकाले खासै जनजीवन प्रभावित भने नभएको उनले बताए ।

प्रसिद्ध धार्मिकस्थल पाथीभरा मन्दिर क्षेत्रमा समेत हल्का हिमपात रहेको पाथीभरा क्षेत्र विकास समितिका कार्यकारी निर्देशक प्रजिन हाङबाङले जानकारी दिए । वर्षासँगै सामान्य हिमपात भएकाले ताप्लेजुङमा चिसो बढेको छ ।

हिउँ पर्न शुरू गरेसँगै पाथीभरा दर्शन गर्न आएका तीर्थयात्री भने हिउँमा खेलेर रमाउन  पाउने भएकाले खुसी भएका छन् ।  गएको वर्षको तुलनामा यो वर्ष ताप्लेजुङमा छिटो हिमपात भएको हो । गएको वर्ष फागुनको दोस्रो सातामात्रै हिमपात भएको थियो ।

वर्षा हुँदा स्थानीय भने खुसी भएका छन् ।लामो समयसम्म वर्षा नहुँदा बालीनाली सुक्न थालेपछि किसान चिन्तित थिए । वर्षाले किसानलाई केही राहत पुगेको फक्ताङलुङ गाउँपालिका–६ का वीर्ख लिम्बूले जानकारी दिए । वर्षा भएसँगै अलैंची, सागसब्जीलगायतका हिउँदे बालीका लागि राम्रो भएको उनले बताए ।