बेलायत जान ७१ जना नर्स अन्तर्वार्ताका लागि छनौट

काठमाडौं । रोजगारीका लागि बेलायत जान ७१ जना नर्स अन्तर्वार्ताका लागि छनौटमा परेका छन् । वैदेशिक रोजगार विभागले ७१ जनाको नाम सार्वजनिक गर्दै अन्तर्वार्ताको लागि बोलाएको हो । 

बेलायतको स्वास्थ्य क्षेत्रमा नेपाली नर्सलाई पदस्थापना गर्नेगरी नेपाल र बेलायतबीच सम्झौता भएको थियो । सोही आधारमा विभागले १०० जना नर्सको लागि अनलाइन आवेदन आह्वान गरेको थियो । जसमा मागभन्दा कम नर्सहरुको भ्यालिड आवेदन परेको थियो । अनलाइन आवेदन दिएकाहरुलाई तोकिएको मापदण्डको आधारमा प्रारम्भिक सूची प्रकाशित गरेको हो ।

उनीहरुलाई डिसेम्बर ४ देखि ७ तारिखसम्म अन्तर्वार्ताको लागि बोलाइएको छ । अन्तर्वार्ता लैनचौरस्थित बेलायती दूतावासमा हुनेछ । नर्सका लागि तोकिएको कडा मापदण्डका कारण थोरै आवेदन परेको थियो । बेलायतले आईएलटीएसमा सात ल्याउनुपर्ने, २ वर्षको कार्यअनुभव भएको हुनुपर्ने लगायतका मापदण्ड तोकिएको थियो ।

पुरानाहरुको हकमा भाषागत समस्या देखिएको थियो । भने नयाँमा कार्यअनुभवको अभाव देखिएको थियो । अनलाइन मार्फत सात सय भन्दा बढीले रजिष्ट्रेशन गरेका थिए । तर, ७५ जनाको मात्रै भ्यालिड कागजपत्र पेश गरिएको थियो । तिनीहरुबाटै विभागले ७१ जनाको प्रारम्भिक सूची तयार पारेको हो ।