एकदिवसीय क्रिकेट इतिहासका १० शानदार, यादगार इनिङ्स

काठमाडौं । मुम्बईको वानखेडे स्टेडियममा मंगलबार भएको आईसीसी विश्वकप २०२३ को निकै रोमाञ्चक खेलमा अष्ट्रेलियाले जित हात पारेको थियो । जुन खेल अफगानिस्तानको पोल्टामा परिसकेको थियो ।

र, यो जितमा अष्ट्रेलियाका अलराउन्डर ग्लेन म्याक्सवेलको योगदान छ, जसको इनिङ्सलाई क्रिकेट फ्यानहरू र धेरै महान क्रिकेटरहरूले एकदिवसीयको उत्कृष्ट पारी भनेका छन्।

एकदिवसीय क्रिकेटको इतिहासमा धेरै अवसरहरू आए जब खेलाडीहरूले उत्कृष्ट व्यक्तिगत स्कोरको मद्दतले आफ्नो टोलीलाई जित दिलाए।अन्तर्राष्ट्रिय क्रिकेट काउन्सिल (आइसिसी)ले यस्तै दश अचम्मको इनिङ्सको सूची बनाएको छ ।

ग्लेन म्याक्सवेल- २०१ रन, अफगानिस्तानविरुद्ध -२०२३ विश्वकप
अफगानिस्तानले दिएको २९२ रनको लक्ष्य पछ्याएको अस्ट्रेलियाली टोलीको शीर्ष क्रम ध्वस्त भएको बेला ग्लेन म्याक्सवेल क्रिजमा आएका थिए ।

खेलको सुरुवातमा अफगानिस्तानले जित्ने धेरै सम्भावना रहेको थियो । तर छैटौं नम्बरमा ब्याटिङ गर्न आएका म्याक्सवेलले आज यस्तो इनिङ खेल्नेछन्, जुन लामो समयसम्म स्मरणीय हुनेछ भन्ने कसैले सोचेको थिएन ।

उनले  १२८ बलमा १० छक्का र २१ चौकाको मद्दतले २०१ रन बनाए र आफ्नो टोलीलाई जित दिलाए, त्यो पनि क्र्याम्पको कारण दुखाइको सामना गर्दै।प्याट कमिन्सले म्याक्सवेलसँग २०२ रनको महत्वपूर्ण साझेदारी गरे । उनले १२ रन मात्रै योगदान गरे पनि एक छेउ सम्हाले ।

रोहित शर्मा- २६४ रन, श्रीलंकाविरुद्ध २०१४
एकदिवसीय क्रिकेटमा सर्वाधिक व्यक्तिगत स्कोरको कीर्तिमान अझै पनि रोहित शर्माको नाममा छ । यो खेलमा भारतले ४ सय ४ रन बनाएको थियो ।

भारतका लागि रोहितले ओपनिङ गरे र इनिङको अन्तिम बलसम्म त्यहाँ रहे। अन्तिम बलमा लङ्ग ओभरमा सट प्रहार गर्ने प्रयास गर्दा उनी क्याचमा परे ।रोहितले १७३ बलको सामना गर्दै ९ छक्का र ३३ चौकाको मद्दतले यो स्कोर बनाए । एक इनिङ्समा सबैभन्दा बढी चौका प्रहार गर्ने कीर्तिमान उनको नाममा छ ।

मार्टिन गुप्टिल- २३७, वेस्ट इन्डिजविरुद्ध, २०१५ विश्वकप
न्युजिल्याण्डका यी ओपनिङ ब्याट्सम्यानले वेस्ट इन्डिजविरुद्ध अपराजित रहँदा २३७ रन बनाएका थिए । यो विश्वकपमा कुनै पनि ब्याट्सम्यानले बनाएको यो सर्वाधिक रन हो ।

यी दायाँ हाते ब्याट्सम्यानको शानदार इनिङ्सको मद्दतले न्युजिल्यान्डको टोलीले वेस्ट इन्डिजलाई क्वार्टरफाइनलमा हराएरपछि फाइनलसम्म पनि पुग्यो ।

यो खेलमा गुप्टिलले १६३ बलको सामना गरेका थिए । उनले ११ छक्का र २४ चौका प्रहार गरे ।

एबी डिभिलियर्स- १४९, वेस्ट इन्डिजविरुद्ध २०१५
यो खेलमा दक्षिण अफ्रिकी कप्तानले एकदिवसीय इतिहासमा सबैभन्दा छिटो शतक बनाएका थिए । यो कीर्तिमान आज पनि कायम छ । उनले मात्र ३१ बलमा आफ्नो शतक पूरा गरे ।यस खेलमा उनले ४४ बलको सामना गर्दै १६ छक्का र ९ चौकाको मद्दतले १४९ रन बनाएका थिए ।

कपिल देव - १७५, जिम्बाब्वेविरुद्ध - १९८३ विश्वकप
यो खेलमा भारतको अवस्था खराब थियो । नौ रनमा चार विकेट खसेको थियो । कपिल देव आए र तुरुन्तै अर्को छेउबाट विकेट खसे। भारतले १७ रनमा पाँच विकेट गुमाएको थियो ।

त्यसपछि भारतीय कप्तानले उत्कृष्ट इनिङ खेले । उनले १३८ बलमा छ छक्का र १६ चौकाको मद्दतले १७५ रन बनाएर भारतलाई आठ विकेटमा २६६ रनको सम्मानजनक स्कोरमा पुर्याए।भारतले यो खेल जित्यो र पछि पहिलो पटक विश्वकप पनि जित्यो।

त्यतिबेला कपिलले बनाएको स्कोर विश्वकपमा छैटौं वरीयतामा रहेका कुनै पनि ब्याट्सम्यानले बनाएको सर्वाधिक रन थियो तर यसपटक म्याक्सवेलले यो रेकर्ड तोडेका छन् ।त्यतिबेला यो एकदिवसीय क्रिकेटमा सर्वाधिक व्यक्तिगत स्कोर पनि थियो।

क्रिस गेल - २१५, जिम्बाब्वेविरुद्ध - २०१५ विश्वकप
वेस्ट इन्डिजका ओपनिङ ब्याट्सम्यान क्रिस गेलले जिम्बावेविरुद्ध खेल्दै विश्वकपको इतिहासमा पहिलो दोहोरो शतक बनाएका छन् ।

उनले १४७ बलमा १६ छक्का र १० चौकाको मद्दतले २१५ रन बनाए ।

वेस्ट इन्डिजको इनिङ्सको अन्तिम बलमा क्याच आउट भएपछि उनी आउट भएका थिए । यदि उनले यो बलमा छक्का प्रहार गरेको भए एक खेलमा सबैभन्दा बढी छक्का प्रहार गर्ने कीर्तिमान बन्ने थियो ।

एडम गिलक्रिस्ट - १४९, श्रीलंकाविरुद्ध - २००७ विश्वकप
अष्ट्रेलियालाई लगातार तेस्रो विश्वकप जिताउन विकेटकिपर ब्याट्सम्यान एडम गिलक्रिस्टको महत्वपूर्ण भूमिका थियो ।

२००७ को विश्वकप फाइनलमा ओपनिङ गर्दा उनले १०४ बलमा १४९ रन बनाए। ३१ औं ओभरमा आउट हुँदासम्म उनले ६ छक्का र १३ चौका प्रहार गरिसकेका थिए ।

उनको १४९ रन अझै पनि विश्वकपको फाइनलमा सर्वाधिक व्यक्तिगत स्कोर हो।

भिभ रिचर्ड्स - १८९, इंग्ल्याण्डविरुद्ध - १९८४
रिचर्ड्सले १३ वर्षसम्म सर्वाधिक व्यक्तिगत स्कोरको कीर्तिमान राखेका थिए।

उनले इंग्ल्याण्डविरुद्ध अपराजित रहँदा १८९ रन बनाएका थिए । उनले १७० बलमा पाँच छक्का र २१ चौका प्रहार गरे।

यस खेलमा उनको टोलीले ९ विकेट गुमाएर २७२ रन बनाएको थियो । त्यतिबेला यो ठूलो लक्ष्य थियो, जसलाई पछ्याउँदा इंग्ल्याण्डको टोली १६८ रनमा सिमित भएको थियो ।

यस खेलमा उनले अफ स्पिन गर्दै ४५ रनमा २ विकेट पनि लिएका थिए ।

रिकी पोन्टिङ - १४०, भारतविरुद्ध - २००३ विश्वकप
विश्वकप फाइनलमा भारतले टस जितेर पहिले फिल्डिङ गर्ने निर्णय गरेपनि डिफेन्डिङ च्याम्पियन अष्ट्रेलियाले दुई विकेट गुमाएर ३५९ रनको विशाल लक्ष्य दिएको थियो ।अष्ट्रेलियालाई विश्वकप जिताउन यो स्कोरमा कप्तान रिकी पोन्टिङको ठूलो योगदान थियो, जसले १२१ बलमा नटआउट रहँदा १४० रन बनाएका थिए।

उनले आठ छक्का प्रहार गरे जुन त्यतिबेला विश्वकप खेलमा ब्याट्सम्यानले प्रहार गरेको सबैभन्दा धेरै छक्का थियो। उनले चार चौका पनि प्रहार गरे ।यो विश्वकपको फाइनलमा अहिलेसम्मकै उच्च व्यक्तिगत स्कोर पनि हो ।

केभिन ओुब्रायन - ११३, इङ्गल्याण्डविरुद्ध - २०११ विश्वकप
३२८ रनको लक्ष्य पछ्याउने क्रममा आयरल्याण्डको मिडल अर्डरको मेरुदण्ड बनेका केभिनले उत्कृष्ट इनिङ्स खेले । यस विश्वकपमा उनले ५९ बलमा शतक बनाएका थिए ।

उनले ६३ बलमा ६ छक्का र १३ चौकाको मद्दतले ११३ रन बनाए । आयरल्याण्डको यो इंग्ल्याण्डमाथि पहिलो जित हो ।यो जित त्यतिबेलाको सबैभन्दा सफल रन चेज भएको अर्थमा पनि महत्वपूर्ण थियो।