राज्यले बिर्सन नसक्ने र अन्तर्राष्ट्रिय क्षेत्रलाई जानकारी हुने गरी काम गर्छौँ : स्वास्थ्यमन्त्री बस्नेत

काठमाडौँ । स्वास्थ्य तथा जनसंख्यामन्त्री मोहन बहादुर बस्नेतले नेपालको स्वास्थ्य क्षेत्रमा के भइरहेको छ,के गर्नुपर्ने हो,समस्या र चुनौती कस्ता हुन र कसरी अघि बढ्ने भन्ने सन्दर्भमा राज्यलेको बिर्सनै नसक्ने गरी र अन्तर्राष्ट्रिय समुदायलाई समेत जानकारी हुने गरी सबै पक्षलाई समेटेर ठूलो कार्यक्रमको आयोजना गर्ने बताएका छन् ।

आज ललितपुरमा आयोजित एक कार्यक्रममा उनले स्वास्थ्य क्षेत्रमा संलग्न सरकार,विभिन्न अन्तर्राष्ट्रिय डोनर,सङ्घ संस्था देखि नीति निर्माता सम्मलाई एउटै मञ्चमा ल्याई सबै क्षेत्रलाई समेटेर स्वास्थ्य क्षेत्रको अवस्था र भविष्यको निकास निकाल्ने गरी विश्व स्वास्थ्य सेवा दिवसको दिन दशरथ रङ्गशालामा ठूलो कार्यक्रमको आयोजना गर्ने र त्यसमा आफूहरूले गरेको काम देखाउने बताए ।

यस्तै उनले स्वास्थ्य शिक्षाको क्षेत्रमा जति राम्रो र धेरै काम गर्‍यो उति नै आफूप्रति गाली बढ्दै गएको आरोप पनि लगाएका छन् ।
उनले समाजमा राम्रो काम देख्न नचाहनेहरू रहेका र उनीहरूबाट गाली धेरै आउने गरेको टिप्पणी गरे । उनले आफूले मन्त्रालयमा आएपछि स्वास्थ्य शिक्षा क्षेत्रमा राम्रा काम गरेका र योगदान पुर्‍याएका कर्मचारीलाई एक कार्यक्रमको आयोजना नै गरी सम्मान गरेको स्मरण गर्दै आवश्यकता अनुसार समाजमा राम्रो काम गर्नेलाई प्रतिस्पर्धाबाट सम्मान गर्नुपर्ने धारणा राखे ।

आफूले मन्त्रालय सम्हालेपछि स्वास्थ्य क्षेत्र र मन्त्रालयको धेरै समस्यालाई समाधान गरेको जिकिर गरेर नथाक्ने उनले आजपनि आफ्ना कामको चर्चा गर्न छाडेनन् । उनी यतिमै रोकिएनन् । स्वास्थ्य शिक्षाको क्षेत्रमा सके जति काम आफूहरूले गरिरहेको उनले बताए ।

धेरै र राम्रा काम गर्नेलाई समाजमा राम्रा काम भएको देख्न नचाहनेले गाली गर्ने भन्दै उनले अरूलाई सचेत गराउँदै भने, ‘सक्ने काम हामी गरिरहेको छौँ । तपाईँहरू पनि जति राम्रो काम गर्नुहुन्छ गाली धेरै आउँछ । हामी बेस्सरी काम सुरु गरिराको छौ, गाली फेरी सुरु भएको छ । समाजमा राम्रो काम देख्न नचाहने हुन्छन् । त्यो समाचारमा झन् धेरै बिक्छ । त्यसको प्रभाह नगरी आफ्नो कमजोरीलाई सुधार्नुपर्छ भनेर हामीले काम गर्ने हो ।’