विपिनसहित कब्जामा रहेका नागरिकलाई छाडिदेऊ : इजरायली राजदूत

काठमाडौँ । नेपालका लागि इजरायली राजदूत हनान गोडेरले प्यालेस्टिनी चरमपन्थी समूह हमासको कब्जामा रहेका नेपाली विद्यार्थी विपिन जोशीको खोजी जारी रहेको बताएका छन् । जोशी सहितका अबोध नागरिकहरूलाई हमासले नियन्त्रणमा लिएको भन्दै उनले उनीहरूलाई मुक्त गर्न आह्वान गरे ।

‘हमासको कब्जामा परेका जोशी कहाँ छन् थाहा छैन । हामीले जोशीको खोजी जारी राखेका छौँ,’ राजदूत गोडेरले आज काठमाडौँमा पत्रकारहरूसँग कुरा गर्दै भने, ‘उनी कुनै पनि टक्कर (कोलिसन)सँग आबद्ध नरहेको स्पष्ट पार्दै अन्तर्राष्ट्रिय स्तरमा समुदायलाई खोज्न आग्रह गरिरहेका छौँ र आतङ्ककारीलाई पनि उनी लगायत कब्जामा रहेका अबोध नागरिकलाई छोड्न आग्रह गरेका छौँ ।’

आइतबार बिहान त्रिभुवन अन्तर्राष्ट्रिय विमानस्थलमा ल्याइपुर्‍याइएका नेपाली विद्यार्थीहरूको शवमा श्रद्धाञ्जली अर्पण गरेपछि पत्रकारहरूको जिज्ञासामा राजदूत गोडेरले अर्को एउटा शव दुई दिनपछि नेपाल आइपुग्ने जानकारी दिए ।