मोटरसाइकल चोरीमा संलग्न २ जना पक्राउ

काठ। मोटरसाइकल चोरीमा संलग्न २ जनालाई काठमाडौंको कलंकीबाट शुक्रवार ट्राफिक प्रहरीले पक्राउ गरेको छ ।

मकवानपुरको बागमती गाउँपालिका–३ घर भई हाल काठमाडौंको स्वयम्भू ठुलोभर्‍याङ बस्ने २२ वर्षीय अमृत पाख्रिन तामाङ र बाराको जितपुर सिमरा उपमहानगरपालिका १६ घर भई ठुलोभर्‍याङ बस्ने २५ वर्षीय बुद्धबहादुर वाइबालाई ट्राफिक प्रहरीले नियन्त्रणमा लिएको हो । 

चोरी भएका मोटरसाइकल खोजतलासको लागि काठमाडौं उपत्यका ट्राफिक प्रहरी कार्यालयमा रहेको पीडित सहायता इकाईबाट खटिएको टोलीले शंकास्पद अवस्थामा च्यासिस र इन्जिनको भाग कोरिएको ना३२प ६६६३ नम्बरको मोटरसाइकलसहित अमृत पाख्रिन तामाङलाई नियन्त्रणमा लिएको थियो ।

मोटरसाइकलको सम्बन्धमा अनुसन्धान गर्ने क्रममा बुद्धबहादुर वाईबाबाट लिएको भन्ने खुलेपछि  वाईबालाई बा९१प १८ ०४ नम्बरको मोटरसाइकलसहित ट्राफिक प्रहरीले नियन्त्रणमा लिएको छ । 

बा९१प १८०४ नम्बरको मोटरसाइकल काठमाडौं उपत्यकाका विभिन्न स्थानमा चोरीमा प्रयोग भएको  खुल्न आएको छ । महोत्तरीको जलेश्वर नगरपालिका–२ घर भई हाल ललितपुरको ग्वार्को बस्ने निकेशकुमार साहले ग्वार्कोस्थित पार्किङस्थलबाट प्रदेश ३ ०२ ००२ प ८९७७ नम्बरको मोटरसाइकल गत बुधवार चोरी भएको भनी काठमाडौं उपत्यका ट्राफिक प्रहरी कार्यालयमा निवेदन दिएका थिए । 

मोटरसाइकलको चोरीमा पनि उनीहरू नै संलग्न रहेको खुल्न आएको काठमाडौं उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्रप्रसाद भट्टले जानकारी दिए ।