निगमले गर्‍यो क्याप्टेन शेरचनलाई निलम्बन

काठमाडौँ । गत अप्रिल १, २०२३ को काठमाडौँ–दुबई–काठमाडौँ उडान रद्द भएपछि नेपाल वायुसेवा निगमले वरिष्ठ क्याप्टेन रवीन्द्रकुमार शेरचनलाई निलम्बन गरेको छ । अप्रिल १ को राति ११ः३० बजेट काठमाडौँ–दुबई उडानको सेडूल भए पनि निगमको चालक (क्याप्टेन) ले दुई घण्टा अघि मात्र आफू बिरामी परेको भन्दै बिदा मागेपछि सो दिनको फ्लाइट क्यान्सिल गर्नु परेको थियो । उक्त घटनामा तत्काल अर्को पाइलटको व्यवस्था गर्न नसकेको भन्दै निगमले शेरचनमाथि कारबाही गरेको हो ।

उक्त समयमा क्याप्टेन शेरचन अप्रेसन डिपार्टमेन्ट अफ हेड रहेका थिए । तर, उनीमाथि छानबिन हुने भए पनि निगमले चैत २८ गते शेरचनलाई निलम्बन गरेर अप्रेसन डिपार्टमेन्ट हेडको जिम्मेवारी वरिष्ठ क्याप्टेन उत्तम घिमिरेलाई दिएको छ ।  सँगै घटनाको यथार्थ छानबिन गर्न निगमले नायव महाप्रबन्धक जनकराज कावाखेतीको संयोजकत्वमा क्याप्टेन सुरज भण्डारी र प्रबन्धक नारायण पौडेलसहितको तीन सदस्यीय छानबिन समिति समेत गठन गरेको छ । समितिको प्रतिवेदनसहित मुद्दाको टुङ्गो नलागेसम्म शेरचनको निलम्बन फुकुवा नहुने निगम स्रोतले रातोपाटीलाई जानकारी दिएको छ ।

‘पाइलट बिदामा बस्ने भएपछि अर्को पाइलटको व्यवस्था गर्नुपर्थ्यो । डिपार्टमेन्ट हेडको जिम्मेवार व्यक्तिले विकल्पमा अर्को पाइलटको व्यवस्था गर्न नसक्नु नै गम्भीर गल्ती हो । पाइलटको अभावमा सो दिनको फ्लाइट नै क्यान्सिल गर्नुपर्दा निगमलाई ठुलो घाटा लाग्न पुगेको छ । घटनाको सत्य, तथ्य छानबिन हुन आवश्यक छ’ स्रोतले रातोपाटीसँग भन्यो– ‘कार्यकारी अध्यक्ष युवराज अधिकारीले तत्कालीन डिपार्टमेन्ट हेड क्याप्टेन शेरचनलाई निलम्बन गरी छानबिन गर्न तीन सदस्यीय समिति गठन गर्नु भएको हो ।’निगमको आन्तरिक छानबिन समितिले घटनाको यथार्थ छानबिन गरी प्रतिवेदन बुझाउनेछ ।