बेइजिङमा कोभिड १९ का बिरामीको सङ्ख्या बढ्दै

काठमाडौँ । राजधानी बेइजिङमा कोभिड–१९ को गम्भीर सङ्क्रमण बढ्दै गएको चीनका स्वास्थ्य विज्ञहरूले बताएका छन् । उत्तर चीनमा जाडो याममा श्वासप्रश्वाससम्बन्धी सङ्क्रामक रोगको प्रकोप बढी हुने गरेकाले कोभिड १९ को सङ्क्रमण बढ्दै गएको बताइएको छ ।

बेइजिङ अस्पतालका श्वासप्रश्वास तथा क्रिटिकल केयर मेडिसिन विभागका प्रमुख ली यानमिङका अनुसार ओमिक्रोन भेरियन्टको सङ्क्रमणपछि केही पाका उमेरका बिरामीमा गम्भीर समस्या देखिएको छ । यद्यपि उनीहरू सबै उपचारपछि सङ्क्रमणबाट निको हुने अपेक्षा गरिएको छ ।

बेइजिङ चाओ–याङ अस्पतालका उपाध्यक्ष तोङ झाओहुइका अनुसार अस्पतालमा पछिल्ला दिनमा दैनिक औसत तीन सय ५० देखि चार सय ज्वरोका बिरामी र पाँच सयको हाराहारीमा आपत्कालीन अवस्थाका बिरामी आउने गरेका छन् ।

बिरामीहरूको सङ्ख्यामा वृद्धि भइरहेका कारण चीनले गम्भीर बिरामीहरूको उपचारका लागि चिकित्सा सुविधाहरू तयार गरेको बताइएको छ । चीनको राष्ट्रिय स्वास्थ्य आयोगका एक अधिकारी जियाओ याहुइका अनुसार तेस्रो श्रेणीका अस्पतालले गम्भीर अवस्थाका कोभिड–१९ का सङ्क्रमितसँगै अन्य गम्भीर बिरामीलाई भर्ना गर्नुपर्छ ।

जिओले भने, “आधारभूत अवस्था भएका ज्येष्ठ बिरामी र बालबालिकालाई अवस्था परिवर्तन हुनेबित्तिकै सिधै तेस्रो श्रेणीका अस्पतालमा स्थानान्तरण गर्नुपर्छ ।’’ चीनको त्रिस्तरीय अस्पताल ग्रेडिङ प्रणालीको शीर्षस्थानमा तेस्रो श्रेणीका अस्पताल छन् । यस्ता अस्पतालमा सबैभन्दा बढी शैय्या रहेका कारण व्यापक चिकित्सा सेवा प्रदान गर्ने बताइएको छ ।