काठमाडौँ । शिक्षा, विज्ञान तथा प्रविधिमन्त्री गिरिराजमणि पोखरेल र आन्दोलनरत साना विद्यार्थी संगठनबीच वार्ता भएको छ ।
आज दिउँसो मन्त्री निवास हरिहरभवन ललितपुरमा भएको वार्तामा शिक्षामन्त्री पोखरेलले आन्दोलनका कार्यक्रम फिर्ता लिन आग्रह गर्नुभएको अनेरास्ववियु क्रान्तिकारीका अध्यक्ष आलोक रायमाझीले जानकारी दिनुभयो ।
मन्त्री पोखरेलले यही असार २० देखि २२ गतेसम्म विद्यार्थी संगठनले घोषणा गरेको शैक्षिक आमहड्ताल फिर्ता लिन आग्रह गर्नुभयो ।
छलफलमा उहाँले विद्यार्थी संगठनले शैक्षिक विकृति र चर्को शैक्षिक शुल्कको विषयमा उठाएका माग सकारात्मक भएकाले माग सम्बोधन गर्न आफू लाग्ने समेत बताउनुभयो ।
उहाँले विद्यार्थीका माग सम्बोधनका लागि शिक्षा मन्त्रालयका सचिव खगराज बराललाई आइतबारदेखि नै गृहकार्य समेत गर्न निर्देशन दिएको क्रान्तिकारीका अध्यक्ष रायमाझीले बताउनुभयो ।
मन्त्री पोखरेलसँगको छलफलमा नेत्रविक्रम चन्द ‘विप्लब’ निकट अखिल क्रान्तिकारीका चिरञ्जीवी ढकाल, समाजवादी विद्यार्थी युनियनका अध्यक्ष विवेक राई, मोहन वैद्य निकट अनेरास्ववियु (क्रान्तिकारी) का अध्यक्ष पेशल दाहालको सहभागिता रहेको थियो । (रासस)
प्रतिक्रिया दिनुहोस