निःशुल्क शल्यक्रिया शिविरबाट १२ सय लाभान्वित

 काठमाडौं । सदरमुकाम गोठलापानीमा सम्पन्न निःशुल्क हाडजोर्नी शल्यक्रिया शिविरबाट करिब १२ सय नागरिक लाभान्वित भएका छन्। जिल्ला अस्पताल बैतडीमा चैत १८ गतेदेखि सञ्चालन भएको उक्त शिविरमा १ हजार १८९ जनाले सेवा लिएका हुन्।

काठमाडौंको जोरपाटीस्थित नेपाल अर्थोपेडिक हस्पिटल, जिल्ला अस्पताल बैतडी र स्वास्थ्य कार्यालय बैतडीको संयुक्त आयोजनामा शिविर सञ्चालन भएको हो।अस्पतालका  सूचना अधिकारी हरिश पन्तका अनुसार शिविरमा ८७ जनाको शल्यक्रिया गरिएको छ भने बाँकीले उपचार सेवा लिएका छन्।

शिविरमा हाडजोर्नी सम्बन्धी समस्या भएका बिरामीको उपचार र शल्यक्रिया गरिएको हो। सामाजिक उत्तरदायित्वअन्तर्गत अस्पतालले निःशुल्क शिविर सञ्चालन गरेको नेपाल अर्थोपेडिक हस्पिटलका वरिष्ठ प्रशासकीय अधिकृत धीरज मैनालीले बताए।

शिविरमा खुट्टाका पैताला फर्केका, जन्मजात हातखुट्टा बांगिएका, हातमा आगोले पोलेका र हातखुट्टामा अन्य विकृतिजन्य समस्या भएकाहरूको उपचार गरिएको हो।
जिल्ला अस्पातलमै सञ्चालन भएको निःशुल्क शिविरमा सेवा लिन पाउँदा स्थानीय बासिन्दा पनि खुसी भएका छन्।