साविक विजेता मुम्बई इन्डियन्स इन्डियन प्रिमियिर लिग (आइपीएल) अंक तालिकाको चौथो स्थानमा उक्लेको छ । कोलकाता नाइट राइडजर्सलाई १ सय २ रनले हराउँदै मुम्बई एक स्थानमा माथि उक्लेको हो ।
बुधबार राति कोलकतास्थित इडेन गार्डेन्स मैदानमा मुम्बईले दिएको २११ रनको लक्ष्यसहित जवाफी ब्याटिङ गरेको घरेलु टोली १८ ओभर १ बलमा अलआउट हुँदै १०८ रनमा समेटियो । कोलकताका क्रिस ल्यान र नितिश रानाले समान २१ – २१ रन जोडेपनि टोलीलाई जिततर्फ लैजान सकेनन् । त्यस्तै टम कुरनले १८, रविन उथप्पाले १४ तथा पियुस चावलाले ११ रन बनाए । कोलकातालाई सस्तैमा समेट्न मुम्बईका कुर्नाल पाण्डया र हार्दिक पाण्डयाले समान २ – २ विकेट लिए ।
यसअघि टस हारेर पहिले ब्याटिङको निम्तो पाएको मुम्बईले पुरै २० ओभर खेल्दै ६ विकेटको क्षतिमा २१० रन जोडेको थियो । मुम्बईका लागि इशान किसनले ६२ रनको अर्धशतकीय पारी खेले । त्यस्तै सुर्य कुमार यादव र कप्तान रोहित शर्माले समान ३६ – ३६ रन जोड्दा बेन कटिङले २४ रनको योगदान दिए । कोलकाताका पियुस चावलाले ३ विकेट लिए ।
यो जितसँगै मुम्बई लिगको चौथो स्थानमा उक्लिएको छ । सुरुवातमा लय गुमाएको मुम्बई जारी सिजन पहिलोपटक शीर्ष चारमा पुगेको हो । मुम्बईले ११ खेलबाट ५ जितसहित १० अंक जोडेको छ । जितपछि मुम्बईले प्ले अफमा पुग्ने सम्भावना कायम राखेको छ ।
पराजित कोलकाता लिगको पाँचौ स्थानमा झरेको छ । कोलकाताले ११ खेलबाट १० अंक नै जोडेको छ । कोलकाताको पनि प्ले सम्भावना कायम रहेको छ । आईपीएलको शीर्ष स्थानमा रहेको सनराइजर्स हैदरावादले १० खेलबाट १६ अंक जोडेको छ । यस्तै दोस्रो स्थानको चेन्नई सुपर किंग्सको १४ अंक रहेको छ । १२ अंक जोडेको किंग्स इलाभेन पन्जाब तेस्रो स्थानमा रहेको छ । -एजेन्सी
प्रतिक्रिया दिनुहोस