महाभियोग प्रस्तावको प्रतिवाद गर्ने एमालेको निर्णय

काठमाडौँ । नेकपा एमालेले प्रधानन्यायाधीश चोलेन्द्र शमशेर जबराविरुद्ध सत्तारुढ दलका ९८ सांसदले दर्ता गरेको महाभियोग प्रस्तावको प्रतिवाद गर्ने निर्णय गरेको छ । आइतबार बसेको एमाले सचिवालय बैठकले महाभियोग प्रस्ताव लोकतन्त्रमाथि प्रहार र गणतन्त्रलाई कमजोर बनाउने षडयन्त्रका साथ आएको निष्कर्ष निकाल्दै एमालेले प्रतिवाद गर्ने निर्णय गरेको हो ।

बैठकपछि महासचिव शंकर पोखरेलले  सोमबार बस्ने संसदीय दलको बैठकमार्फत थप निर्णय गरिने बताए । एमालेले सम्पूर्ण रुपमा महाभियोगको प्रतिवाद गर्ने र जनतालाई  पनि महाभियोगको विपक्षमा उभिन आग्रह गर्ने पनि उनले बताए । माओवादी र कांग्रेस सत्तामा भएको बेला सधै प्रधानन्यायाधीशमाथि महाभियोग लगाएर आक्रमण गर्ने गरेको भन्दै पोखरेलले यसको प्रतिवादमा उत्रिनुपर्ने सचिवालयको निष्कर्ष रहेको सुनाए ।

बैठकले सभामुख अग्नि सापकोटाले संसदमा सन्तोषजनक भूमिका निर्वाह गर्न नसकेको ठहर पनि गरेको छ । उनलाई मार्गप्रशस्त गर्न वा गल्ती सच्याउन पनि एमालेले विकल्प दिएको छ ।