पश्चिम बंगालमा बीजेपी नेताको गोली लागेर मृत्यु, राजनीतिक विवाद चर्कियो

एजेन्सी । बीजेपीको उत्तर दिनाजपुर जिल्ला युवा मोर्चाका उपाध्यक्ष मिथुन घोषको गोली लागेर मृत्यु भएको छ। यो घटना उनको घर अगाडी भएको हो।

लापरवाहीको कारण गोली चलेपछि मिथुनको ज्यान गएको जनाइएको छ । तर उनका परिवारले तृणमूल कांग्रेसको संरक्षणमा असमाजिक तत्वहरुले मिथुनको ह’त्या गरेको आरोप लगाएको प्रहरीले जनाएको छ ।

मिथुनको ह’त्यापछि यस मुद्दामा राजनीतिक विवाद तीव्र भएको छ। यस घटनामा प्रहरीले एक जनालाई पक्राउ गरेको छ। प्रदेश बीजेपी अध्यक्ष सुकान्त मजुमदार सोमबार घटनास्थलको भ्रमण गर्ने छन्।

एक प्रहरी अधिकारीका अनुसार मिथुनलाई आइतबार राति १० बजे इटहार पुलिस स्टेशन क्षेत्रको राजग्रामस्थित घरको अगाडि गोली हानिएको थियो।

उनको परिवारका सदस्यहरु र स्थानीय बासिन्दाले उनलाई तुरुन्तै रायगञ्ज मेडिकल कलेज अस्पताल पुर्याएका थिए । अस्पतालमा डाक्टरहरुले उनलाई मृत घोषित गरेको जनाइएको छ।