एमसीसीविरुद्ध लागे केपी ओली

काठमाडौं । प्रमुख  प्रतिपक्षी  दल नेपाल कम्युनिस्ट पार्टी (एमाले)ले अमेरिकी सहयोग परियोजना  (एमसीसी)लाई  यथास्थितिमा  पारित  नगर्ने सङ्केत गरेको छ।

 बुधबार बसेको नेकपा (एमाले) संसदीय दलको बैठकमा प्रमुख प्रतिपक्षी  दलका नेता तथा एमाले अध्यक्ष केपी शर्मा ओलीले जनताको अभिमतअनुसार नै एमाले अगाडि बढ्ने भएकाले यथास्थितिमा एमसीसी पारित नहुने स्पष्ट पारेका हुन् ।

दलको बैठकमा बोल्ने २५ जना सांसदले एमसीसीबारे पार्टीको धारणा माग गरेका थिए ।  एमालेका  मुख्य  सचेतक  विशाल  भट्टराईका अनुसार  सांसदहरूले  जनताको  तहबाट  एमसीसीको विरोध भइरहेको, यसमा जनताको सहमति नरहेकाले जनताको असहमति मिचेर पार्टी जान नहुने सुझाव राखेका थिए ।

सांसदहरूको जिज्ञासाको जवाफमा अध्यक्ष ओलीले बैठकमा राख्नुभएको भनाइ उद्धृत  गर्दै  मुख्य  सचेतक  भट्टराईले  भने, “हामी  जनताको  विपक्षमा  जाँदैनौँ।  जनताले  गलत भनेको  कुरालाई  गलत  भन्छौँ।  

जनताले  एमसीसीको विरोध गरेको छ भने त्यहीअनुसार पार्टीले काम गर्छ।” अध्यक्ष  ओलीले  एमसीसी  सम्झौता  आफूहरूले नगरेको र यसलाई काँधमा हाल्न जरुरी पनि नरहेको बताए । गोरखापत्रमा खबर छ ।