मेलम्चीको बाढीले बनायो सुकुम्बासी

हेलम्बु । बेंसीमा सडक विस्तारसँगै गाउँको जग्गा बेचबिखन गरी १८ वर्षअघि हेलम्बु–२ ढोडेनीबाट किउलको गणेशे बगर झरेका थिए, धनबहादुर तामाङ। तर, मेलम्ची खोलामा असार १ गते आएको बाढीले घर र साढे चार रोपनी खेत बगाएपछि धनबहादुर सुकुम्बासी भएका छन्। यससँगै छोराछोरीलाई राम्ररी पढाउने सपनासमेत बाढीले बगाएको छ। उनीहरू यति बेला छिमेकीसँगै टेन्ट हालेर बसेका छन्। 

उनका छिमेकी कामी तामाङको घरसँगै गरिखाने १५ रोपनी खेत पनि बाढीले बगायो। ‘अहिले तत्काल त दाताले दिएको राहतबाट पेट पालिएला’, कामी भन्छन्, ‘दाताले दिन छाडेपछि जहान बच्चा लिएर कहाँ जाने रु’ आफू बाँचे पनि गरिखाने ठाउँ नभएपछि रातभर निदाउन नसक्ने उनी बताउँछन्। 

लरीमाया तामाङ चनौटे बजारमा भूकम्पपछि बनेको पक्की घर बगाएपछि अन्य छिमेकीसँगै टेन्टमा बसिरहेकी छन्। एक महिनाअघि बितेकी बुहारीको घेवा गर्न नपाएको उनको दुखेसो छ। असार पहिलो साता बुहारीको घेवा गर्ने योजना बनाएकामा १ गते नै बाढी आएपछि उनी घरबारविहीन अवस्थामा पुगेकी हुन्। 

जीवनभर कमाएको धन सम्पत्ति बाढीले लगेपछि उनका श्रीमान साङ्बो लामाको मन थिरमा छैन। उनीहरूले यसै वर्ष मात्र घर निर्माण सकेर बस्न थालेका थिए साङ्बो दिनभर मन बहलाउन गाउँ डुल्ने गरेको लरीमाया बताउँछिन्। ‘घरमा भएको केही निकाल्न पाइएन’, लरीमाया भन्छिन्, ‘अब बाँकी जीवन कसरी बिताउने हो रु’

दमै तामाङले खेतबारी र घरसँगै ६० लाख रुपैयाँभन्दा बढी लगानी गरेर सुरु गरेको ट्राउट माछा फार्म गुमाउनुपर्‍यो। ऋण लिएर सुरु गरेको व्यवसाय बाढीले बगाएपछि ऋण कसरी तिर्ने भन्ने चिन्ताले उनलाई सताउन थालेको छ। अन्नपूर्ण पोष्ट दैनिकमा खबर छ ।