बाबुराम भट्टराईको टिप्पणी- एमाले जेठ ३ मा फर्किए, त्यसयता भएका राष्ट्रघात सबै माफ हुन्छन्?

काठमाडौं । जसपाका संघीय परिषद् अध्यक्ष डा बाबुराम भट्टराईले प्रधानमन्त्री तथा एमाले अध्यक्ष केपी ओलीले पार्टी एकताका लागि गरेको आह्वानप्रति टिप्पणी गरेका छन् ।

एमालेको आन्तरिक विषयमा टिप्पणी गरेका उनले सो पार्टीलाई ओलीले जेठ ३ मा फर्काए ओलीले गरेको सबै राष्ट्रघात फिर्ता हुन्छ भनि प्रश्न गरेका छन् । 

एमाले कणहरूसँग जिज्ञासा भन्दै भट्टराईले ट्वीटरमार्फत सोधेका छन्, ‘तपाईंहरू सबै जेठ ३ मा फर्केर एउटै चूलामा बाक्लो दालसहित भातभान्सा गरेमा त्यस यता ओलीले गरेका २–२पटकका संसद विघटन,संवैधानिक अंगहरूको अवैध कब्जा,यति र ओम्नी लगायतका अर्बौंको भ्रष्टाचार, सांसद अपहरण, कोरोनापीडित लाखौंको विचल्ली, अक्षम्य राष्ट्रघात सबै माफ हुन्छन् ?’

प्रधानमन्त्री ओलीले आइतबार राति एक आह्वान गर्दै पार्टी एकताका लागि ६ बुँदे प्रस्ताव अघि सारेका थिए ।