प्रधानमन्त्री ओलीलाई भेटेको कुरा डा बाबुराम भट्टराईले स्वीकारे, किन रहेछन् भेटेका ?

काठमाडौं । जनता समाजवादी पार्टी (जसपा) का अध्यक्ष डा बाबुराम भट्टराईले प्रधानमन्त्री केपी शर्मा ओलीलाई भेटेको स्वीकारेका छन् । एमालेका नेता महेश बस्नेतले एक टिभीको अन्तर्वार्तामा बाबुराम भट्टराईले प्रधानमन्त्री ओलीलाई भेटेर प्रधानमन्त्री मागेको खबर सार्वजनिक गरेपछि भट्टराईले ओलीलाई भेटेको खुलासा गरेका हुन् । 

पूर्वप्रधानमन्त्री डा भट्टराईले आइतबार ट्वीटरमार्फत् महाविपत्ति उन्मुख देशलाई निकास दिन मैले व्यक्ति ओलीलाई होइन प्रम ओलीलाई भेटेको बताएका छन् । एमाले नेता बस्नेतले डा बाबुराम भट्टराई रातको एक बजे गएर प्रधानमन्त्री ओलीलाई भेटेर आफूलाई प्रधानमन्त्री दिन मागेको खबर सार्वजनिक गरेका थिए । 

खबर सार्वजनिक भएपछि भट्टराईले मैले प्रधानमन्त्रीलाई भेटेर राष्ट्रिय सरकार बनाऊ भनेको बताएका छन् । भट्टराईले भनेका छन्, ‘उहाँले नमानेपछि अरूलाई नभनेको हुँ,’ । उनले अझै पनि धारा ७६ (५) बमोजिम बनाउन सकिने बताउँदै त्यसबारे सोच्न आग्रह पनि गरेका छन् । उनले प्रधानमन्त्री ओलीलाई भेट्दा आफूले प्रधानमन्त्री नमागेको बताए । डा भट्टराईले वर्तमान र पूर्वप्रधानमन्त्रीबाहेकका असल व्यक्तिलाई प्रधानमन्त्री बनाएर राष्ट्रिय सरकार बनाउन प्रस्ताव गरेको बताए ।