काठमाडौं । प्रधानसेनापति पूर्णचन्द्र थापाले संगठनभित्र सुधार गरिएका विषयहरुको दीर्घकालीन कार्यान्वयनमा चासो देखाएका छन् । कार्यकालको तेस्रो वर्ष सुदृढीकरण र दिगोपनको वर्ष घोषणा गरेका थापाले संगठन सञ्चालन प्रक्रियामा गरिएका सुधार र सकरात्मक कदमको निरन्तरताका लागि अभियान थालेका हुन् ।
यसैका लागि थापाले आइतबार जंगीअड्डामा चार दिने संगठनात्मक परिवर्तन, सुदृढीकरण र दिगोपन सम्बन्धी गोष्ठी सुरु गरेका छन् । भविष्यमा पनि कार्यान्वयनमा ल्याइने सकरात्मक कार्यक्रमहरुको दिगोपनलाई सुनिश्चित गर्न यो कार्यक्रम गरिएको जंगीअड्डाको भनाइ छ ।
कार्यक्रममा विशेषत भावी पुस्ताको नेतृत्व गर्ने वर्गलाई सहभागी गराइएको छ । सेनामा कायम रहेका पद्धति र प्रणालीलाई सुदृढ गर्दै लैजानका लागि उनीहरुलाई राखेर कार्यक्रम गरिएको भनिएको छ । उद्घाटन सत्रमा बोल्दै प्रधानसेनापति थापाले संगठनको भविष्य वर्तमानमा निर्भर हुने बताउँदै परिवर्तन दिगो हुनुपर्नेमा जोड दिएका छन् ।
रक्षा मन्त्रालय, नेपाल प्रहरी, सशस्त्र प्रहरी बल र राष्ट्रिय अनुसन्धान विभागका प्रतिनिधिसमेत सहभागी कार्यक्रममा संगठन सञ्चालन र परिवर्तन व्यवस्थापन सम्बन्धी विविध विषयहरुमा गैरसैनिक विषय विज्ञहरु तथा सैनिक अधिकृतहरुबाट पनि प्रेटेन्टेसन, अन्तरक्रिया र छलफल हुने सैनिक प्रवक्ता सन्तोष बल्लभ पौडेलले बताए ।उनका अनुसार सेमिनार सकिएपछि छलफलमा भएका विषयहरुबाट निस्किने निचोडलाई समेटेर प्रतिवेदन समेत प्रकाशन गरिनेछ ।
प्रतिक्रिया दिनुहोस
सफल खबर संवाददाता
आइतबार, ०२ फागुन २०७७, १३ : ४०
लेखकबाट थप