सभामुख उम्मेदवारी दर्ता आज, काँग्रेस अझै अलमलमा

काठमाडौं । माघ १२ गते दिउँसो ३ बजेपछि मतदान गर्ने गरी तय गरिएको प्रतिनिधीसभाको सभामुख पदका लागि आज उम्मेदवारी दर्ता हुदैछ । निर्वतमान सभामुख कृष्णबहादुर महरा संसदकै एक महिला कर्मचारीमाथी बलात्कार प्रयासको आरोपमा पदमुक्त भएपछि १४ असोज देखि संसद सभामुख विहिन छ ।

उपसभामुख डा. शिवमाया तुम्बाहाम्फेले पनि सोमबार पदबाट राजीनामा दिएपछि संसदका दुवै पद रिक्त छ । सभामुखका लागि संसद सचिवालयले १२ माघमा दिउँसो ३ बजे संसद बैठक बोलाएर मतदान गर्ने गरी कार्यतालिका तय गरिसकेको छ । संघीय संसदका महासचिव मनोहरप्रसाद भट्टराईका अनुसार, सभामुख पदका लागि आज बिहान ११ बजेदेखि २ बजेसम्म उम्मेदवारी दर्ताको कार्यतालिका तय गरिएको छ ।

उम्मेदवारी दर्ता सचिवालयले नयाँ बानेश्वरस्थित संसद भवनको ल्होत्से हलमा गर्न सक्ने गरि ब्यवस्था मिलाएको छ । संसदमा झण्डै दुई तिहाई बहुमत रहेको नेकपाले सभामुखमा पार्टीका स्थायी समिति सदस्य अग्निप्रसाद सापकोटालाई उम्मेदवार बनाउने औपचारिक निर्णय गरिसकेको छ । उनले आजै बिहान साढे ११ वजे वानेश्वरस्थिन ल्होत्से हलमा पुगेर उम्मेदवारी दर्ता गर्ने कार्यक्रम रहेको नेकपा नेताहरुले बताएका छन् ।

संसदमा सभामुख निर्वाचित हुन कुल २ सय ७५ सांसद मध्ये १ सय ३८ सांसदको मत भए पुग्छ । तर नेकपा एक्लैसंग संसदमा १ सय ७४ मत छ । त्यसमध्ये निर्वतमान सभामुख महरा भने निलम्वित अवस्थामा छन् । उनले मतदान गर्न पाउने छैनन् । त्यसो गर्दा नेकपाको आफ्नै पार्टी भोट १ सय ७३ रहेकोले सापकोटा स्वतः निर्वाचित हुने छन् ।

महराको निर्वाचनका बेला काँग्रेसले यही अवस्था देखेर सभामुखमा उम्मेदवारी दिएको थिएन । त्यसबेला महरा सभामुख पदमा निर्विरोध निर्वाचित भएका थिए । तर प्रतिपक्ष काँग्रेसले अहिले सभामुखमा पार्टीको उम्मेदवारी दिने-नदिने विषयमा कुनै औपचारिक निर्णय भने लिईसकेको छैन । काँग्रेसले उपसभामुख सत्तारुढ दल नेकपाले आफनो पार्टीलाई दिएको खण्डमा सभामुखमा उम्मेदवारी नदिने सन्देश नेकपाका नेताहरुसम्म पु¥याएको छ ।

संविधानतः सभामुख र उपसभामुख एकै राजनीतिक पार्टीवाट बन्न नपाउने ब्यवस्था छ । सोही आधारमा पनि सभामुख नेकपाले जितिरहदा उसले उपसभामुखमा आफनो उम्मेदवार उठाउन पाउने छैन् । सभामुख लिनकै लागि बहालबाला उपसभामुखलाई नेकपाले सोमबार पदबाट राजीनामा गराउन लगाएको थियो ।

सभामुखमा पार्टी उम्मेदवारी दिने नदिनेमा प्रतिपक्ष काँग्रेस अझै अलमलमै छ । उसले अहिले बिहान पार्टी संसदीय दलको कार्यसमिति बैठक राखेको छ । दल बैठकमा यस बारेमा छलफल गरेर निर्णयमा पुगिने काँग्रेस संसदीय दलका प्रमुख सचेतक बालकृष्ण खाँणले सफलखवर अनलाइनलाई बताए । ‘हामी अहिले केही बेरमा संसदीय दलको कार्यसमितिको बैठक बस्दैछौं, त्यहाँ छलफल गरेर मात्र एउटा निर्णयमा पुग्छौं,’ काँग्रेस प्रमुख सचेतक खाँणले भने ।

अन्य साना दलले भने सभामुखमा उम्मेदवारी दिने विषयमा केही सोचेका छैनन । ‘हामीले उम्मेदवारी दिएर के हुन्छ र ? यसतिर हामीले सोचेकै छैनौं’ नेपाल मजदुर किसान पार्टीका नेता प्रेम सुवालले भने ।