बागलुङ । मंगलबार भोज खान गएका बेला राजनीतिक विवाद हुँदा काँग्रेस कार्यकर्ताले प्रहार गरेको ढुङ्गाले लागेर माओवादी केन्द्रका एकजना नेता घाइते भएका छन् । बागलुङको पश्चिम निसीखोला गाउँपालिका वडा ६ भल्कोटका लालकुमार बुढाले हानेको ढुङ्गाले लाग्दा सोही ठाउँका २६ वर्षीय कुशल बुढामगर गम्भीर घाइते भएका हुन् ।
निसीको भल्कोटकै रिनुबाङ भन्ने ठाउँमा भएको विहेभोजमा गएका उनीहरुबीच भनाभनपछि मंगलबार राति १० बजे ढुङ्गा प्रहार भएको निसी प्रहरी चौकीका प्रहरी सहायक निरीक्षक राजेन्द्र भुजेलले जानकारी दिए ।
भुजेलले पीडित बुढाले बुधबार बिहान उजुरी दिएपछि पीडकलाई लिन पठाएको बताए । बुढाको उनको निधार र दाहिने हातमा गम्भीर चोट लागेको छ । स्थानीय मेडिकलमा उपचार पछि थप उपचारका लागि बुर्तिबाङ ल्याउदै गरेको बताएको छ । कुशल नेकपा माओवादी केन्द्रका नेता हुन् ।
प्रतिक्रिया दिनुहोस