उदारवादी लोकतन्त्र र समाजवादी लोकतन्त्र एउटै रुखका दुई हाँगा : बाबुराम भट्टराई

काठमाडौँ ।  नेसपा (नयाँ शक्ति) का अध्यक्ष डा.बाबुराम भट्टराईले उदारवादी र समाजवादी लोकतन्त्र एउटै रुखका दुईवटा हाँगा भएको बताएका छन् ।

बुधवार चन्द्रप्रसाद न्यौपाने स्मृति ग्रन्थ लोकार्पण कार्यक्रममा बोल्दै पूर्व प्रधानमन्त्री समेत रहेका भट्टराईले दलहरूबिचको सहकार्यबाटै लोकतान्त्रिक गणतन्त्रको रक्षा गरेर अघि बढ्न सकिने बताए ।

‘लोकतन्त्र नै प्रमुख कुरा हो । उदारवादी र समाजवादी लोकतन्त्र एउटै रुखका दुई वटा हाँगा हुन्’, भटट्राईले भने,  ‘हामीले एक अर्कालाई निषेध गर्नुभन्दा पनि आपसमा राम्रा कुराहरू सिक्ने र खराबलाई त्याग्ने गरी अघि बढ्यौ भने मात्र सङ्घीय लोकतान्त्रिक गणतन्त्रको रक्षा गरेर अघि बढ्न सकिन्छ ।’ 

नेता भट्टराईले अहिले विभिन्न ढङ्गले प्रतिगामी शक्तिहरू सल्ब लाइरहेको भन्दै त्यस्तो शक्तिले लोकतन्त्रवादीहरूमा विभाजन ल्याउन खोजेको बताए ।  ‘उनीहरूले विभाजन ल्याउन खोजेका छन् ।

अहिलेको जटिल भूराजनीतिक अवस्थामा हामीले सङ्कीर्ण गुटगत र दलगत चिन्तनभन्दा राष्ट्रिय हितलाई माथि राखेर सहकार्य गर्नुपर्छ’, भट्टराईको भनाइ छ ।  कार्यक्रमका सहभागीहरूले स्व.न्यौपानेले नेपाली राजनीतिमा गरेको योगदानको चर्चा गरेका थिए ।