नेपाल एयरलाइन्सद्वारा ऋण बापतको ५३ करोड ९ लाख भुक्तानी

काठमाडौँ । नेपाल वायु सेवा निगम (नेपाल एयरलाइन्स)ले अन्तर्राष्ट्रिय उडानको लागि खरिद गरेका दुई न्यारोबडी र दुई बाइडबडी जहाजको लागि लिएको ऋणको किस्ता भुक्तानी गरेको छ । 

एयरलाइन्सले कर्मचारी सञ्चय कोष र नागरिक लगानी कोषबाट ख्ण लिएको थियो । जसअनुसार ऋण दायित्व मध्ये दुई न्यारोबडी जहाजको २०८१ चैत्र महिनाको किस्ताबापत पुरा र  दुई वाइडबडी जहाजको आंशिक गरी चैत्र ३१ गते ५३ करोड ९ लाख ५५ हजार २८१ रुपैयाँ भुक्तानी गरेको  निगमका प्रवक्ता सुवास डाँगीले जारी गरेको विज्ञप्तिमा उल्लेख छ।  

व्यवस्थापन वर्तमान नेतृत्वले सम्हालेपश्चात् निगमले २०८१ चैत्र सम्मको अवधिमा ७ अर्ब ३९ करोड ५ लाख ८ हजार ९५ रुपैयाँ किस्ता रकम भुक्तानी गरेको समेत उनले बताए । 

साथै, विश्वव्यापी कोरोना भाइरसको कारण निगमको व्यापारमा परेको असर अवधिको व्याज, व्याजको व्याज, हर्जाना र पेनल छुट गरी सहयोग गरिदिन एवं किस्ताको सङ्ख्या वृद्धि गरेर ऋण दायित्व भुक्तानीलाई सहजीकरण गरिदिन समेत निगमले कर्मचारी सञ्चय कोष र नागरिक लगानी कोषलाई अनुरोध पत्र पठाएको छ ।  यस सम्बन्धमा छलफल समेत भइरहेको निगमको भनाइ छ ।