इलाम । इलाममा सञ्चालित शताब्दी बचत तथा ऋण सहकारी संस्थाले शनिबार विभिन्न क्षेत्रमा योगदान पुर्याउने व्यक्तिलाई सम्मान गरेको छ ।
संस्थाको १५औँ वार्षिक साधारणसभाका अवसरमा सहकारी विषयमा विद्यावारिधि गर्ने डा भुपाल थापा लगायतलाई सम्मान गरेको हो । थापा सहकारी विषयमा विद्यावारिधि गर्ने जिल्लाकै पहिलो व्यक्ति छन् ।
सहकारीले आव ०७३/७४ मा कूल रु २३ करोड छ लाख १४ हजार ७६४ को कारोबार गरेको छ । एक हजार ३९५ जना शेयर सदस्य रहेको संस्थामा सदस्यको बचत रकम करिब नौ करोड रहेको छ । सदस्यलाई राहत तथा हित कार्यक्रमअन्तर्गत संस्थाले मृतक सदस्य राहत कोष, एम्बुलेन्स भाडामा छुट सुविधा, सुत्केरी पोषण खर्च र गम्भीर प्रकृतिको रोग उपचार खर्चसमेत उपलब्ध गराउँदै आएको प्रतिवेदनमा उल्लेख छ ।
सामाजिक दायित्व पूरा गर्ने उद्देश्यका साथ वार्षिकोत्सवमा सामाजिक क्षेत्रमा काम गर्दै आएको संघसंस्थालाई पनि सहयोग गर्ने क्रममा यस वर्ष इलामका ‘सहयोगी हात’ नामक संस्थालाई रु पाँच हजार ५०० समेत प्रदान गरिएको वार्षिक प्रतिवेदनमा उल्लेख गरिएको छ ।
कवि शीरोमणिको जन्मजयन्ती मनाइयो
कवि शीरोमणि लेखनाथ पौड्यालको १३४औँ जन्मजयन्ती शनिबार इलाममा पनि साहित्य वाचन गर्दै मनाइएको छ । विश्व नारी नेपाली साहित्य सम्मेलन इलामको नियमित शृङ्खलासँगै शीरोमणि पौड्यालको जन्मजयन्ती मनाइएको हो । जिल्लाका साहित्यकारले साहित्यमार्फत कवि शीरोमणि पौड्याललाई सम्झिए । उनका कृति र उनले साहित्य क्षेत्रमा पुर्याउनुभएको योगदानको चर्चासमेत गरियो ।
कार्यक्रममा जीवनहरि शर्मा, देवी गौतम, विमल वैध, गीताराम निरौलालगायत दर्जन बढी कवि तथा साहित्यकारले साहित्यिक कृति वाचन गरेका थिए । संस्थाकी अध्यक्ष प्रतिभा पौडेलको अध्यक्षतामा सम्पन्न कार्यक्रमा नेपाली साहित्यका अग्रज व्यक्तित्व कवि शीरोमणि पौड्यालले साहित्यमा पुर्याएको योगदान नयाँ पुस्ताले भुल्न नहुने वक्ताहरुले विचार राखे ।(रासस)
प्रतिक्रिया दिनुहोस